terça-feira, 28 de março de 2017

Hasai ona ema millaun resin hosi Queensland tanba siklone

Autoridade australianu hasai ona ema millaun resin, inklui turista sira, hosi Nordeste Austrália hodi antesipa siklone Debbie, ne'ebé karik sei hanesan siklone violentu liu ne'ebé maka to'o iha rejiaun ne'e iha tinan hirak ikus ne'e.

Siklone ne'e forma hela iha loron hirak ne'e nia laran iha largu hosi Estadu Queensland no karik sei to'o kontinente australianu iha loron-tersa dadeer, hatete hosi Gabinete Meteorolojia lokal iha loron-segunda ne'e.

Iha loron-segunda kalan iha Queensland, siklone Debbie hetan klasifikasaun ba kategoria haat (kategoria lima hanesan violentu liu).

Populasaun sira hosi Estadu Queensland (iha Nordeste Austrália) hetan ona avizu kona-ba risku sira ne'ebé iha ligasaun ho tempestade ne'e, ida ne'ebé violentu liu dezde siklone Yasi iha tinan 2011.

Ema hamutuk 3.500 resin maka hasai ona hosi sidade sira Home Hill ho Proserpine, hosi kilómetru 100 resin hosi súl hosi fatin turístiku Townsville, pontu importante ida hosi exkursaun ba Great Barrier Reef.

Ema rihun rua resin hosi zona kosteira sentral hosi Bowen hein hela hodi bele sai hosi rejiaun.

Iha fatin seluk, populasaun rihun 25 hosi rejiaun planísie sira hosi Mackay hetan konsellu hodi hela iha pontu aas sira, hodi antesipa laloran sira ne'ebé bele to'o metru 2,5.

Eskola hamutuk atus resin maka taka ona hanesan mós portu sira iha rejiaun.

Responsável hosi polísia Queensland nian, Ian Stewart, indika ona katak siklone bele halo ona vítima mortal ida: turista ida ne'ebé mate ona iha asidente ida viasaun nian, karik tanba meteorolojia.

Bainhira to'o iha rai, siklone sei hamosu udan boot no anin maka'as ho rajada kilómetru 280 tuir oras ida. "Laloran maka'as sira konstitui mós iha fatór risku ida no bainhira siklone to'o iha kosta durante tasi nakonu, nia efeitu sira sei sai aat liu", hatete hosi Gabinete Meteorolojia australianu nian.

SAPO TL ho Lusa

Sem comentários: