segunda-feira, 27 de março de 2017

PARABENS BA PNTL…!!!

PARTILHAR

Jornal Nacional Diário, editorial

Polisia Nasional Timor Leste, segunda feira ohin, loron 27 Marsu selebra aniversario ba dala XVII (27 Marsu 2000 – 27 Marsu 2017). Serimonia ofisial aniversario instituisaun seguransa interna nee halao Kuartel Geral, Polisia Nasional Timor Leste nian, Dili.

Aniversario nee, laos atu festeiza deit,  importante atu instituisaun seguransa nasaun nian nee halo reflesaun ba ninia empeñamentu durante tinan 17 nia laran atu bele refleta esperensia, dezafius no susesu sira nebe instituisaun nee iha ninia esistensia.

Nudar sidadaun nebe diak, hato’o parabens ba komando jeral Polisia Nasional Timor Leste nebe festeza sira nia loron harii instituisaun polisia nian ba dala XVII. Aniversario atu orgulho saida mak instituisaun nee halo ba nasaun, li-liu garante lei no ordem no seguransa ba sidadaun sira.

Polisia Nasional Timor Leste nee esiste tinan 17, la signifika perfeitu ona, maibe presiza hadia an nafatin, li-liu formasaun no kapasitasaun atu nunee sai polisia ida nebe profesional iha ninia empeñametu loron ba loron.

Laiha duvida, publiku sempre halo komparasaun ba atuasaun Polisia Nasional Timor Leste (PNTL) ho Falintil – Forsa Defeza Timor Leste (F-FDTL) maibe haluha tiha katak konstituisaun atribui kompetensia nebe la hanesan.

Polisia ninia papel importante atu defende legalidade demokratiku no garante sidadaun sira nia seguransa internu no prevensaun kriminal tenke halao ho respeitu ba diretus humanos no  F-FDTL asumi responsabilidade garante independensia nasional, integridade teritorial, liberdade no populasaun nia seguransa hasoru agresaun ruma ka ameasa externa  no respeitu orden konstitusional.

Atu asegura kompetensia nebe konsituisaun fo tamba nee dala balu polisia halo atuasaun asves viola lei, uza forsa atua problema ruma. Ne’ebe iha maneira atuasaun nee dala balu la satisfaz sidadaun nian maibe nee mak knar seguransa nian.

Polisia nudar instituisaun Estadu nian nebe garante seguransa sidadaun sira nian maibe dala balu mos violensia mai husi kedas oknum instituisaun seguransa sira ho hafoer polisia ninia naran diak iha publiku.

Tan nee, iha ambitu aniversario nee, atu refleta saida mak polisia sira halo diak no saida mak polisia halo ladun diak iha komunidade nia let, hodi nunee iha futuru labele repete tan.

Los duni, maske polisia nia atuasaun dala balu la satisfatoriu, atua problema ruma sempre uza forsa maibe jeralmente publiku apresia servisu polisia nian, tamba susesu fo seguransa ba festa demokrasia, eleisaun presidensial hodi nunee povu tomak eserse sira nia direitu voto.

Dala ida tan, parabens ba membro polisia tomak nebe durante nee dedika an hodi garante seguransa nasaun nian no mos seguransa ba nia sidadaun sira nebe sai nudar direitu ida nebe garantido iha konstituisaun Republika Demokratika Timor Leste.*
PARTILHAR

Author: verified_user

Publicação luso-timorense sem fins lucrativos

0 comentários: