ME Fo Formasaun Book Keeping

DILI – Ministeriu Edukasaun (ME), fo ona formasaun book keeping ba koperativa eskolar haat iha Munisipiu Dili.

Kestaun nee fo sai husi asesor koperativa eskolar ME, Daniel Pereira katak, formasaun nee haree liu ba oinsa koperativa eskolar haat bele fahe esperensia ba malu.

Nia fo ezemplu husi eskola ETI, fahe sira nia esperensia konaba loke ona sira konta bankaria iha banku Timor, maibe sira lori koperativa nian naran, tanba formasaun book keeping nee forma sira, bele hatene konaba livru cash ou keixa hanesan osan tama no sai.

Koperativa eskolar iha Cristal, Eskola Tekniku Informatika (ETI), 5 de Maio, eskola hospitalidade turizmu iha Becora, tanba eskola haat neebe mak hari ona koperativa eskolar nee, iha semana kotuk nee ami halao formasaun iha eskola sekundaria privadu Cristal, formasaun nee haree liu ba iha book keeping, depois oinsa mak atu hatama osan fulan nee, hodi priense kolom neebe mak prepara ona, konaba depozitu prinsipal, depozitu obrigatoriu no  volontariu,” dehan Daniel ba STL iha edifisiu ME Vila-Verde, Dili, Segunda  (13/03/2017).

Daniel hatete, ME establese koperativa eskolar iha eskola 5 de Maio, depois haree kedas loja neebe mak sira hari liu husi koperativa eskolar, tanba loron ida sira bele hetan too 50 dolar. Koperativa eskolar iha eskola 5 de Maio mos hetan ona visita husi Malaysia, hodi haree lalaok koperativa eskolar iha eskola nee.

Hau hanoin prosesu iha ensinu iha koperativa eskolar nee, durante ita halao nee, tanba primeiru ita halo desiminasaun iha Munisipiu Lospalos, Baucau, Covalima, Same, Maliana, maibe iha Munisipiu balun mak seidauk halao, depois de desiminasaun nee ita halao tiha ona koperativa eskolar, neebe ita halao primeiru mak iha eskola sekundaria no 5 de Maio Becora, hanesan ita hotu hatene katak, depois ita establese koperativa eskolar iha eskola sekundaria jeral no 5 de Maio Becora, tanba vise Ministru Edukasaun II mak ba halo lansamentu ba iha koperativa eskolar nee iha eskola 5 de Maio,” tenik nia.

Nunee mos Diretor eskola sekundaria jeral no 5 de Maio Becora, Manuel Verdial hatete, hanesan diretor eskola orgulhu no agradese ba ME, tanba sira bele promove estudante sira, liu husi koperativa eskolar.

Estudante sira loke ona kios iha eskola, para bele faan sasan hanesan ai sar, ember, dosi, aqua no seluk tan. Tanba nee, sira agradese ba ME, neebe mak iha inisiativa diak, hodi hari koperativa eskolar iha eskola 5 de Maio.

Ami sente orgulhu boot ba ami, tanba ami bele promove dadaun ona ami nia estudante, bainhira ami nia estudante sira remata sira nia estudu, sira bele iha koinesementu neebe mak klean konaba setor koperativa,” dehan nia.

Diretor Jeral husi ME, Antoninho Pires dehan, politika ME hari koperativa eskolar, atu bele prepara rekursu umanu neebe mak diak, bainhira estudante sira remata estudu iha nivel sekundaria, sira bele kompete iha kampu servisu.

Nia dehan sira bele hari rasik koperativa, tanba nee, agora ME hari ona koperativa eskolar iha Munisipiu Dili, hein katak, sei hari mos iha Munisipiu. Jacinta Sequeira

Suara Timor Lorosae