Situasaun Hakmatek Durante Kampaña

DILI, (ANTIL) – Segundu Komandante Jerál, Polísia Nasionál Timor Lorosa’e (PNTL), Komisáriu Faustino da Costa informa, rezultadu seguransa kampaña iha semana ikus ne’e la’o hakmatek.

“Situasaun seguransa jerál iha teritóriu nasionál oras ne’e la’o di’ak”, Faustino ba jornalista sira iha kuartel jerál, Segunda, (13/3) hafoin enkontru avaliasaun ba situasaun seguransa rai laran.

Mesmu nune’e, problema udan no rai lakan konsege halo a’at ekipamentu PNTL hanesan rádiu komunikasaun. “Iha Manatuto no Viquque udan no rai lakan mak estraga sasan balun hodi afeita ba komunikasaun”, katak.

Loron 18 Marsu komando sei koloka tan membru hosi nasionál ba munisípiu sira. PNTL sei kontrola másimu hasoru militante no apoiante sira ne’ebé viola lei.

Kazu Asidente Tránzitu

Okaziaun ne’e, komando rejista insidente tránzitu ba transporte públiku hahú Janeiru to’o loron 8 fulan-Marsu hamutuk 352. Husi kazu ne’e rezulta ema mate 17 todan no kmaan hamutuk 434.

Entretantu, rezultadu operasaun fim de semana iha kapitál, apreender taxi no mikrolet hamutuk 250, motor 116 tanba laiha karta kondusaun, la-renova dokumentu no seluk tan.

Operasaun ne’e nu’udar meiu atu prevene no redus númeru insidente tránzitu iha kapitál. (Jornalista: Agapito dos Santos - Editora: Rita Almeida)

Foto: Segundu Komandante Jerál, Polísia Nasionál Timor Lorosa'e (PNTL), Komisáriu Faustino da Costa. Foto Relasaun Públikas MI