DILI,
(TATOLI) - Ministériu Komérsiu, Indústria no Ambiente (MKIA) lansa ona website,
livru no disku audiovizuál kona-ba tais atu promove ba mundu konaba produtu
lokál tais Timor-Leste nian.
Lansamentu
ba website www.taistimorleste.com/index.php?mid=7 iha
loron 30 Marsu, iha otél Novo Turismo ne’e, liuhusi kooperasaun entre MKIA ho
PT. Archa Indonesia durante tinan ida hodi halo estudu no peskiza konaba tais
Timór iha munisípiu 13 hodi hakerek iha livru nune mós ho formatu dijitál atu
fasilita ema hodi bele haree no hatene tais ne’ebé sai hanesan identidade
nasional.
Ministru
Constâncio Pinto hatete, ho rezultadu projetu husi MKIA nian kontribui ba
esforsu hodi lori tais ba rejistu iha UNESCO nomós proteje tais, tanba
produtu tais la’ós iha Timór de’it maibé iha fatin seluk mós.
Aleinde
ne’e, promove tais hodi hetan naran iha mundu, rejiaun Ázia no Timor-Leste
rasik hodi hatudu katak Timor-Leste iha poténsia husi Tais nian ne’ebé bele
dezenvolve.
“Ha’u
hein katak ida ne’e la’ós atu haree de’it no livru la’ós atu tau iha ita-nia coffe
table para loroloron ema haree maibé tenke garante ninia kontinuidade
liuliu iha produsaun ba produtu. Ha’u fiar katak customers, ema ne’ebé
buka ita-nia tais, bainhira ema enkomenda ita-nia tais, ita iha hela de’it para
haruka ba”, dehan ministru.
Liuhusi
website ne’e, MKIA halo promosaun tais ba iha mundu no ema barak mak sei haree
no livru sira sei fahe ba embaixada nomós disko audiovizuál nian atu
haree, lee no hatene sobre tais.
Diretora
PT. Archa Indonesia, Anjar Budiyani informa, produsaun livru tais ne’e
lako’alia liu tais hanesan aspetu kulturál maibé papél importante ne’ebé halo
ona husi MKIA, tékniku halo tais ho tradisionál, karaterístika tais iha kada
munisípiu, tais hanesan forsa ekonomia no komérsiu nomós nia forsa iha
dezenvolve indústria kreativu.
“Produtu
audiovizuál tais ne’ebé kontein prosesu halo tais, tais iha rituál, tais
as dress no tais iha ekonomia komérsiu”, katak Anjar.
Anjar
hatutan website ne’ebé halo mós sai hanesan mídia promosaun no komérsiu produtu
tais ba iha rai-liur. (Jornalista : Maria Auxiliadora/Editor : Alberto
Alves)
Foto:
Tais Timor-Leste, Foto espesiál.
Sem comentários:
Enviar um comentário