Lei Eleisaun Presiza Hadia

DILI – Prezidente Partidu Demokratiku (PD) husu ba governu liu-liu Sekretariadu Tekniku Administrasaun Eleitoral (STAE) no mos Komisaun Nasional Eleisaun (CNE) presiza hadia lei eleisaun.

Tuir Prezidente PD, Mariano Asanami Sabino katak, partisipasaun povu nian iha eleisaun nee importante tebes, tanba liu husi ema nia votus mak bele transforma ba ukun ida.

Ukun ida labele mai husi manipulasaun ida, ukun ida labele mai husi vota sala ida, ukun ida labele fo limitasaun ema lavota, entaun ba PD presiza hadia liu tan lei nee,” dehan Prezidente PD, Mariano ba jornalista sira hafoin remata lansamentu sede Sekretariadu Nasional Colmera-Dili, Sabadu (01/04/2017).

Prezidente PD, Mariano haktuir, presiza hadia lei nee atu bele fasilita povu hodi vota iha fatin neebe deit labele vota tuir kartaun eleitoral, ezemplu nia iha Bobonaro tenke ba vota iha Lolotoe nee dalan dook liu susar ba vota iha neeba.

Iha fatin ketak, Jose da Silva “La Baruk” hanesan estudante, husu ba STAE no CNE atu hadia mekanismu atu nunee povu Timor Leste tomak bele vota iha kualker sentru votasaun neebe iha. Raimundo S. Fraga

Suara Timor Lorosae