Na’an Fraka Brazíl Livre Hosi Kontaminasaun

DILI, (TATOLI) – Rezultadu teste laboratorium ne’ebé halo hosi Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA. I.P) ho Laborátoriu Nasionál Saúde hatudu, na’an fraka husi Brazíl livre husi kontaminasaun kímika.

“Na’an sira importadu husi Brazíl, haree ba barrometru rua ne’e la-kontaminadu tanba indika rezultadu ne’ebé negativu katak sira la-kontamina ho formalin ou boraks”,  Ângelo Belo nu’udar Diretór Departamentu Planeamentu Operasionál, Risku Alimentár no Laboratóriu informa liuhusi konferénsia imprensa ne’ebé hala’o iha Matadouru, ohin.

Relasiona produtu na’an manu ne’ebé bele dura to’o fulan ho kondisaun ne’ebé di’ak nafatin tanba iha substánsia kímiku ne’ebé bele tau sai substánsia konservante hodi konserva produtu refere nia durasaun.

“Na’an Brazíl, sira tau ácido sórbiku, ne’ebé nia hanesan konservante maibé ita deskonfia tanba iha nia rins ka selang ne’ebé iha sei iha toleránsia katak laliu kritikál limite ne’ebé iha entaun la-problema ba saúde maibé liu ida ne’e sei implika ba saúde”, katak.

Teste ne’ebé halo iha loron 28 marsu to’o 4 abril foin lalais ne’e ba na’an fraka ho marka Languiro hosi Brazíl mak 1400 grama, Sadia-Brasil 800 no 100 grama, Perdigão-Brasil 900 grama, nomós na’an kulat ho marka Flambola-Brasil no Sossis Borrila 340 grama ne’ebé rekolla iha supermerkadu Lita Store, Happy Market, Leader, Kmanek no Centro iha Praia dos Coquiros.

Hosi servisu ne’e, koordena ho Diresaun Nasionál Veterinária, Ministériu Agrikultura no Peska, halo asaun preventiva liuhusi inspesaun emerjénsia hodi submete ba análize laboratoriál, tanba loron 17 fulan-marsu produtu na’an husi empreza boot rua Brazíl, sai polémika iha mundiál, deskonfia labele konsumu.

Kestaun ne’e, koordenadór AIFAESA I.P, Abílio Oliveira Sereno hatete, ekipa halo mós komunikasaun ho reprezentante Estadu Brazíl iha Timor-Leste hodi asesu ba informasaun kona-ba fenómenu na’an fraka iha Brazíl hodi akompaña direta progresu investigasaun ba kazu refere.

Estadu Brazíl rasik foti medida ba prevensaun, garante situasaun kontroladu husi konsumidór brazileiru no halo konfirmasaun ba Nasaun seluk ne’ebé mantein relasaun komersiál ho sira hodi informa natureza invesigasaun ne’ebé hala’o daudaun. (Jornalista: Maria Auxiliadora - Editora: Rita Almeida)

Foto: Na'an manu hosi brazil. Foto google