Empreza Tempe Balun Utiliza Formalin

DILI, (TATOLI) – Rezultadu análize laboratoriál husi Laboratóriu Nasionál, Ministériu Saúde hatudu tempe ne’ebé prodús husi empreza rua, pozitivu kontamina substánsia kímika perigoza hanesan formalin, nune’e labele atu konsumu.

Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA. I.P) no Ministériu Saúde, iha loron 3 fulan-abríl halo inspesaun emerjénsia hodi amostra iha estabelesimentu produsaun tahu-tempe  neen iha Autoridade Munisipál Dili no rua indentifika utiliza formalin.

Produsaun tahu-tempe neen ne’ebé ekipa konjunta halo inspesaun lokaliza iha Postu Administrativu Dom Aleixo no Hera.

“Estabelesimentu sira seluk ne’ebé submete ba análize laboratoriál hatudu rezultadu negativu ka la kontamina substánsia kímika perigoza ruma, nune’e bele atu konsumu”, informa Koordenadór AIFAESA I.P, Abílio Oliveira Sereno liuhusi konferénsia imprensa ne’ebé hala’o iha Matadouru, ohin.

Bazeia ba artigu 14 alinea b, husi dekretu lei númeru 23/2009, 5 Agostu, rezultadu laboratoriál ba empreza tempe rua ne’e prátika ona infrasaun kontra jenuinidade, kualidade ka kompozisaun jéneru alimentíjiu, nune’e AIFAESA foti medida konkreta hodi responde ba situasaun refere.

AIFAESA liuhusi koordenadór jerál ne’ebé reprezenta inspetór jerál tuir artigu 35 husi dekretu lei númeru 26/2016, 29 Juñu, bazeia ba artigu 11 alinea g, hasai desizaun liuhusi despaxu desizaun finál ho númeru referénsia 73/AIFAESA/IV/2017 no 74/AIFAESA/IV/2017 hodi notifika ba infratór rua iha loron 12 Abríl atu ezekuta desizaun enseramentu temporáriu ba loron 90 hodi hadi’a produsaun no trata lisensa komersiál iha loron 10 nia laran.

“Bazeia ba desizaun, AIFAESA ho fundamentu ba artigu 42 aleinea e husi dekretu lei númeru 23/2009, 5 agostu, sei akompaña ezekusaun ba desizaun enseramentu ba estabelesimentu refere, no se aplika enseramentu temporáriu ba estabelesimentu koersivamente karik infratór lakumpri notifikasaun iha loron 10 nia laran”, subliña.

Diretór Departamentu Planeamentu Operasionál, Risku Alimentár no Laboratóriu, Ângelo E. Belo esplika  bainhira produtu sira ne’ebé kontein formalin ne’e insektu sira labele besik.

“Animais ki’ikoan sira ne’e labele besik tanba formalin nia iis maka’as maibé ida ne’e ita deskonfia de’it, ita labele hatete ema nia produtu ne’e ladi’ak. Ho deskonfiansa mak lori ba análize laboratóriu para justifika loloos produtu ne’e di’ak ka la’e”, esplika.

Karaterístika ba produtu tempe ne’ebé kontein formalin mak testura tempe ne’ebé toos liu duké tempe baibai, lasente fore-keli nia iis, insektu (lalar ou animais ki’ikoan seluk) sira labesik, iha substánsia iis kímiku no dura kleur liu.  (Jornalista: Maria Auxiliadora - Editora: Rita Almeida)

Foto: Tempe. Foto Google