Organizasaun G7+ sei iha reprezentasaun iha Lisboa ho tulun hosi autoridade lokal sira

Grupu G7+, ne'ebé nia membru sira hanesan nasaun sira ne'ebé konsideradu fraku, sei loke reprezentasaun europeu ida iha Portugal ho tulun hosi Kámara Munisipal Lisboa, fó sai hosi Xanana Gusmão, membru hosi Konsellu Konsultivu hosi Organizasaun Internasional, iha loron-kinta ne'e.

"Horiseik (loron-kuarta), ami hasoru malu ho prezidente Kámara Munisipal Lisboa nian (Fernando Medina). Ami husu asisténsia no nia sei fó mai ami fatin ida hodi harii ami nia eskritóriu iha ne'e, hodi ami iha prezensa iha ne'e iha Europa. Ami sei iha prezensa iha Europa ho sede ida iha Lisboa", deklara hosi Xanana Gusmão, ne'ebé nu'udar mós ministru Planeamentu no Investimentu Estratéjiku Timor-Leste nian.

Xanana Gusmão ko'alia ba jornalista sira hafoin hasoru malu ho prezidente Asembleia Repúblika Portugal nian, Ferro Rodrigues, no ho prezidente hosi grupu parlamentar hosi Portugal-Timor-Leste, José Soeiro, iha Asembleia Repúblika portugeza, iha Lisboa.

"Ha'u mai iha la'ós hanesan reprezentante Timor-Leste nian maibé hanesan parte integrante hosi grupu ki'ik hosi nasaun 20 ne'ebé fraku. Iha grupu ne'e halo parte mós São Tomé & Prínsipe ho Guiné-Bissau, Timor-Leste, aleinde Serra Leoa, Sudaun-Súl, Iémen, Afeganistaun, Haiti, Illa Salomaun ho Papua Nova Guiné”, hatutan hosi Xanana Gusmão ne'ebé hanesan mós eis-primeiru-ministru no antigu Prezidente timoroan nian.

Xanana Gusmão deklara katak Ferro Rodrigues hatudu "koñesimentu di'ak ida" hosi esforsu grupu hosi nasaun fraku sira no ne'ebé simu "apoiu boot" ida hosi grupu parlamentar amizade Portugal-Timor-Leste.

"G7+ hanesan grupu ida hosi nasaun sira ne'ebé sai ona hosi konflitu ka iha situasaun konflitu, ka sei fraku iha mós kestaun instituisaun no iha konstrusaun Estadu nian", ministru timoroan ne'e hatete.

Xanana Gusmão iha loron-kinta ne'e vizita Parlamentu portugés hamutuk ho prezidente hosi organizasaun internasional ne'e no mós ministru Planeamentu hosi Serra Leoa, Momodu Lamin Kargbo, no membru sira seluk hosi instituisaun ne'e.

Momodu Lamin Kargbo agradese tebes apoiu hosi povu portugés no hosi autoridade sira Portugal nian ne'ebé fó ba G7+, hodi fó hanoin katak Serra Leoa deskobre hosi navegador portugés Pedro Sintra, iha tinan 1460.

G7+ hanesan organizasaun intergovernamental internasional ida ne'ebé nia objetivu oferese lian koletivu ida ba nasaun sira ne'ebé konsidera hanesan fraku, ne'ebé sai afetadu ka hanesan afetadu hela hosi konflitu sira, hodi hametin dalan sira no permiti aprendizajen hosi par sira kona-ba oinsá bele hetan reziliénsia no apoiu entre nasaun membru sira.

Iha loron 10 fulan-Abril 2010, iha Díli, Timor-Leste, halo ona reuniaun inaugural G7+ nian, ne'ebé membru sira hatudu vontade hodi estabelese grupu hanesan organizasaun internasional, kontinua hasoru malu noo fahe experiénsia sira no projetu sira.

SAPO TL ho Lusa