quinta-feira, 13 de abril de 2017

PN Aprova LPV, Karakteriza Deputadu Laiha Kualidade

DILI – Mesmu Parlamentu Nasional (PN) aprova ona Lei Pensaun Vitalisia (LPV), maibe sosiedade sivil kontinua halo kritika makas ba lei nee, tanba laiha mudansa signifikativu tanba nee konsidera katak deputadu laiha kualidade.

Tuir Sekretariu Jeral Konsellu Nasional Juventude Timor Leste (CNJTL), Luis Ribeiro hatete katak, deputadu sira hanesan reprezentante povu iha uma fukun tenke deskuti lei nee ho didiak hodi haree ba lei nia impaktu ba futuru nee.

Deputadu sira neebe iha parlamentu nasional aprova lei pensaun vitalisia nee laiha kualidade tanba lahateke ba oin,” dehan Sekretariu Jeral Konsellu Nasional Juventude Timor Leste (CNJTL), Luis ba STL iha nia knar fatin Farol-Dili, Kuarta (12/04/2017).

Sekretariu Jeral CNJTL, Luis haktuir, deputadu laiha kualidade tanba lakonsege detekta saida mak akontese iha tinan sanulu ida mai nee tanba nee mak deputadu sira aprova ho lalais nee. Nia sublina, tuir lolos sira ba nee atu servi povu hodi halo mudansa ba povu nia moris diak laos hanoin deit ba sira nia moris hodi hariku-an.

Iha fatin ketak, Observador Politika-UNTL, Camilio Ximenes Almeida dehan, deputadu sira neebe mak oras nee tur iha parlamentu nasional ita haree laos reprezenta povu tanba ladeskuti povu nia problema. Raimundo S. Fraga

Suara Timor Lorosae

1 comentário:

Antonio Verdial de Sousa disse...

Karik povu maka direta hili nia reprejentante ita fiar povu la hili maluk sira ne ida. Tamba saeda ? Ita dala barak akompana maluk distintu deputadu sira la defende no la koalia povu nia susar. Maibe maluk sira defende liu buat sira nebe tuir lolos ladun iha prioridade. Balun hadau malu projetu, balun hamaluk malu liu ho kompania sira. Hateten klaru deit defende liu sira nia'an duke tau matan ba nesesidade komum no bazika emar lubun nian. Husik povu matenek maka sei determina sira nia destinu iha fulan Jullu tinan 2017