Proposta 84 Tama Iha Unidade Apóiu Sosiedade Sivíl

DILI (TATOLI) – Koordenadór Sosiedade Sivíl, Joaquim Freitas dehan iha tinan fiskál 2017, sosiedade sivíl komesa hahu simu proposta fulan Dezembru to’o 30 Janeiru 2017 no totál proposta tama iha unidade apóiu sosiedade sivíl hamutuk 84, proposta 47 mak passa, 34 la passa, no 3 pendente no presiza halo diskusaun ho PM, Kinta (30/3).

“Husi 84 proposta, sei submente ba prosesu selesaun neb’e sei envolve ministériu relevante no iha ekipa ida kompostu husi ema nain 7”, informa Joaquim Freitas hafoin asina kontratu ho ONG ba projeitu sira ne’ebé hetan ajuda husi Governu liuhosi fundus sosiedade sivíl, iha Palásiu Governu.

Iha prosesu selesaun envolve MS, MAP, SEPFOPE, MAE, ME, nune’e mós reprezentante sosiedade sivíl husi organizaun rua.

Joaquim Freitas informa, proposta ne’ebe mak passa selesaun ona, sosiedade sivíl konvida organizasaun nain 20 atu asiste asina kontratu ne’e, nune’e mós iha obra sira ne’ebe mak iha kontinuasaun hanesan Igreja Jumalai, Igreja Aimutin, salaun Parokiál Katedrál, Igreja Bekora, no eskola múzika, iha mós apóiu ba relijiaun Hindu ne’ebé mak iha prosesu ADN no sira kontinuasaun hotu.

“Iha oportunidade ida ne’e, ami konvida Amu husi Igreja Aimutin nomós Amu Pároku Zumalai atu reprezenta sira seluk hodi asina memorandun atendimentu”, dehan tan.

Alende kontinuasaun obra sira, remata iha polítika foun ne’ebe komesa implementa liu-liu ba konfisaun relijiozu ne’ebé sei iha asina kontratu entre Primeiru-Ministru (PM) ho prezidente episkopál hodi halo tranferensia ne’e direitamente ba prezidente episkopál hodi jere.

“Tamba tinan ida ne’e ita iha eleisaun 2 (prezidensiál no parlamentar), maluk sira ne’ebé husu osan bot, ami tenta kontinua fó apóiu halo redusaun no mantein, laiha proposta ne’ebé mak ami aprova 100%, maibé ami koa hotu ituan, koa para iha kreatividade buka fundu iha fatin seluk”, afirma.

Nia informa tan, organizasaun ne’ebé halo dezenvolvimentu integradu, fásil halo monitorizasaun, avaliasaun no hare nia progressu tamba komunidade nia fatin ita bele asesu.

“Sosializasaun lei, difísil ituan ba ami atu halo monitorizasaun ne’ebé bele hetan rezultadu katak la’o duni ka lae” katak.

Haktuir lei transferensia publik, katak tranfere 40% hafoin hatama relatóriu mak tranfere fali 60% tuir. (Jornalista: Julia Chatarina/Editor: Alberto Alves)

Foto: Asina kontratu ho ONG ba projeitu ne’ebé hetan ajuda husi Governu liuhosi fundus sosiedade sivíl, Kinta (30/3). Foto Agencia TATOLI: Egas Cristovao

LEE LIU IHA TATOLI