HIV/AIDS HAMATE ONA TIMOROAN 80

Ema nain 80 mak mate ona ba moras Human Immuno Deficiency/Acquired immune Deficiency Syndrome (HIV/AIDS) husi total afeitadu nain 642.

Iha tinan 2016 komunidade jeral liu-liu ho idade 24 to’o 44 ne’ebé komete HIV ne’e atinji 60%, joven ho idade 14 to’o 25 husi eskola sekundaria to’o universidade ne’e iha 28%, labarik tinan 5 mai kraik ne’e iha ida ou rua no agora halo hela tratamentu saúde.

Bazeia ba dadus ne’ebé maka rezistadu iha Ministériu Saúde dau-daun ne’e munisípiu Díli maka risku makaas ba HIV, tanba iha Díli ema nain 300 ba leten maka komete HIV, segundu maka munisípiu Bobonaro ho ema nain  60 ba leten, depois Covalima, tuir fali Oe-Cusse no Baucau.

Diretor Prevensaun Edukasaun Comissão Nacional Combate HIV/SIDA Timor-Leste (CNCS-TL), Atanasio de Jesus informa “Ema ne’ebé afeitadu HIV/AIDS hamutuk nain  642, husi numeru ne’e nain 80 maka mate ona, 280 resin iha hela tratamentu ARV iha hospital, ne’e ita garantia sira nia vida naruk, saudavel no sira nia imunidade diak”.

“Sira ne’ebé maka ativu tratamentu ne’e ita laduun duvidas ho sira, maibé ita duvidas maka sira ne’ebé seidauk hetan tratamentu, tanba sira nafatin halo sira nia atividade hanesan balun ho vida prostituisaun no mezmu balun ema normal maibé kontinua halo hela hahalok risku hodi transmiti virus HIV ba ema seluk,”dehan Atanasio ba JN-Diário hafoin remata sosializasaun informasaun kombate HIV/AIDS ba estudante sira iha Escola Secundaria Geral Públika (ESGP) paralelu Bogoro, Bazartete, Liquiça, Sesta (28-04-2017).

Ba sira ne’ebé maka HIV pozitivu maibé la halo tratamentu, CNCS-TL buka hela meius atu sira bele hetan tratamentu. Dau-dauk ne’e CNCS-TL, Ministériu Saúde no Orzanizasaun Naun Govermentais (ONG) implementador sira hanesan Estrela+ no Esperansa buka hela ema sira ne’ebé maka komete HIV atu halo tratamentu ARV.

Estudante Escola Secundaria Geral Públika (ESGP) paralelu Bogoro, Carlito da Silva dehan informasaun ne’ebé maka CNCS-TL hato’o bele konsensializa estudante ESGP paralelu Bogoro ida-idak, oinsa hadook an husi virus HIV/AIDS, hodi partisipa iha konstrusaun Estadu. ves

Jornal Nacional Diário