Ema rihun resin deslokadu iha Nova Zelándia tanba siklone Debbie

Pelumenus ema rihun haat sai deslokadu iha loron-kinta ne'e hosi fatin rua iha Illa Norte Nova Zelándia nian tanba inundasaun sira ne'ebé mosu tanba siklone Debbie ne'ebé to'o, ne'ebé nia pasajen liuhosi Austrália halo ema na'in lima mate.

Tuir autoridade neozelandés sira, rezidente rihun rua resin hosi fatin Edgecumbe, iha norte illa nian, hasai ona, hafoin mota Rangitaiki nakonu no hamosu inundasaun iha uma oioin.

Iha fatin viziñu Whakatane deklara ona estadu emerjénsia, no hasai ona ema rihun rua seluk.

Tuir previzaun ofisial sira, bee hosi Rangitaiki sei mantén iha nível aas sira to'o loron-sesta dadeer, bainhira hein katak sei hahú tuun.

Patrulla polísia oioin haree hela fatin sira hodi evita naok iha uma abandonadu sira, haktuir hosi jornal New Zealand Herald, no blokeia ona estrada sira ne'ebé liga sidade sira ne'e.

Durante loron-kinta ne'e, eskola atus resin taka ona, haktuir hosi Ministériu Edukasaun.

Iha Austrália, ne'ebé Debbie to'o ona kategoria 4 iha máximu 5, temporal halo ema na'in lima mate no afeta ona ema na'in rihun sia, husik situasaun ida ne'ebé klasifika hanesan "katástrofe" hosi impaktu ekonómiku iha área sira turizmu no agríkola iha estadu New South Wales.

Debbie sai hanesan siklone maka'as liu ne'ebé maka afeta Austrália dezde Yasi, ne'ebé iha tinan 2011 hamosu ondulasaun sira ne'ebé halo estraga oioin iha litoral.

SAPO TL ho Lusa