terça-feira, 9 de maio de 2017

Rezultadu definitivu: Macron eleitu ho 66,10% hosi votu sira

PARTILHAR
Sentrista Emmanuel Macron eleitu ona 66,10% hosi votu sira, kontra 33,90% hosi kandidata extrema-direita Marine Le Pen, fó sai hosi rezultadu definitivu sira hosi volta daruak eleisaun prezidensial sira franseza nian iha loron-segunda.

Abstensaun to'o ona 25,44% hosi inskritu sira, nível rekord ida.

Tuir informasaun sira ne'ebé fó sai iha loron-segunda ne'e hosi Ministériu Interior iha nia pájina Internet, eis-ministru Ekonomia hetan ona apoiu hosi eleitor millaun 20,75 no líder hosi Frente Nasional apoiada hosi millaun 10,64.

Abstensaun to'o 25,44% hosi inskritu sira, aas liu dezde tinan 1969, no votu mutin sira no nulu sira rejista rekord ida hosi 11,47% votu sira.

Macron, ne'ebé sei sai Prezidente joven liu hosi Repúblika franseza, eleitu ho tinan 39, hetan ona nia rezultadu di'ak sira iha Paris, ho persentajen ida besik 90%, no iha departamentu sira ne'ebé besik Hauts-de-Seine ho Val-de-Marne, ne'ebé aas liu 80%.

Departamentu rua úniku Fransa nian ne'ebé maka líder hosi extrema-direita hetan liu votu maka Aisne no Pas-de-Calais, fatin rua iha norte Fransa nian ho persentajen aas liu 52%.

Pasajen hosi Prezidente antigu, sosialista François Hollande, ba Prezidente eleitu sei hanoin ba iha finde-semana oinmai.

François Hollande: Emmanuel Macron simu pose iha loron-domingu

Prezidente fransés, François Hollande, fó sai iha loron-segunda ne'e katak prezidente eleitu, Emmanuel Macron, nia tomada pose sei halo iha loron-domingu.

Hollande no Macron mosu hamutuk iha públiku, iha loron-segunda ne'e, ba dala uluk dezde Emmanuel Macron demiti hosi kargu ministru Ekonomia nian hosi governu Hollande nian, iha Agostu, hodi lansa nia kandidatura prezidensial.

Kandidatu independente sentrista manán ona volta daruak hosi prezidensial sira, iha loron-domingu, ho 66,1% hosi votu sira, halakon kandidata hosi extrema-direita, Marine Le Pen, ne'ebé hetan 33,9%, haktuir hosi rezultadu total sira ne'ebé fó sai iha loron-segunda hosi Ministériu Interior.

SAPO TL ho Lusa | Foto@ Yoan Valat/EPA
PARTILHAR

Author: verified_user

Publicação luso-timorense sem fins lucrativos

0 comentários: