terça-feira, 9 de maio de 2017

Facebook apaga konta millaun resin hosi notísia falsu sira iha Reinu Unidu

PARTILHAR
Responsável sira hosi rede sosial Facebook apaga ona konta hosi utilizador sira hamutuk millaun resin iha Reinu Unidu antes eleisaun lejislativu britániku iha loron 08 Juñu, iha ámbitu hosi kampaña ida kontra notísia falsu sira ne'ebé fó sai online.

Boot teknolójiku norte-amerikanu nian publika mós iha imprensa tradisional britániku anúnsiu ida ne'ebé fó konsellu sira kona-ba oinsá hetan notísia falsu sira ne'e [fake news].

Anúnsiu fó konsellu ba leitor sira hodi "labele fiar ba títulu sira" hosi notísia sira no husu ba sira atu "observa ho atensaun URL" [morada dijital hosi pájina Internet nian].

Anúnsiu sira hahú sai iha jornal tradisional sira iha surat-tahan hanesan The Times, The Guardian no Daily Telegraph.

Facebook nia konsellu sira hodi tulun leitor sira hodi hetan notísia falsu sira inklui: "labele fiar iha títulu sira", "haree ho atensaun ba URL [morada pájina nian]", "investiga fonte", "iha atensaun ba formatasaun ida ne'ebé oinseluk [hosi pájina sira web nian]", "konsidera foto sira", "konfirma loron", "le sasin sira seluk", "Pesa ne'e hanesan piada ida [ka sátira ruma]?".

Kompañia afirma mós katak iha daudaun progresu hodi deteta di'ak liu konta sira hosi Facebook ne'ebé fó sai notísia falsu sira.

Diretór ida hosi Facebook ba Reinu Unidu, Simon Milner, hatete ba ajénsia AP katak plataforma hakarak to'o "problema nia abu" no serbisu daudaun ho organizasaun externa sira - Full Fact ho First Draft - hodi verifika faktu sira no analiza konteúdu sira relasionadu ho lejislativu britániku sira iha loron 08 Juñu.

"Facebook halo buat hotu ne'ebé nia bele hodi hasoru ho problema hosi notísia falsu sira", Milner hatete.

Analista hosi fenómenu polítiku no mediátiku duun ba notísia falsu sira influénsia balun iha rezultadu sira hosi referendu britániku kona-ba saída hosi UE (Brexit) no iha eleisaun prezidensial norte-amerikanu sira.

Kompañia norte-amerikanu sei hahú tuun iha ranking popularidade [ne'ebé determina nia divulgasaun] buat sira ne'ebé ema hakarak le maibé la fahe.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: