TR Diside Ona Distiñu João Câncio

DILI (TATOLI) – Juiz Koletivu Tribunál Rekursu (TR) iha Segunda (17/07) liu ba diside ona “Distiñu” Eis Ministru Edukasaun, iha Governu Aliansa Maioria Parlamentar (AMP), João Câncio da Costa Freitas ho krime administrasaun danoza, Codigu Penal, Artigo 274 no 1 ho no 2.

Bazeia ba dokumentu TR ne’ebé mak TATOLI asesu haktuir katak, TR absolve arguido hosi krime partisipasaun ekonomiku no negósiu, Artigu 299 Partisipasaun ekonómika.

Maibé, kondena arguido ho Artigu 274 Administrasaun danoza, pontu 1) Ema ne’ebé, kuandu iha obrigasaun atu fó-destinu ka administra ema-seluk nia interese, servisu ka bem patrimoniál, maski nia mós sosiedade ka pesoa koletiva ne’ebé soi interese, servisu ka bem sira-ne’e nia sósiu, hamosu prejuizu patrimoniál signifikativu ekonomikamente tanba nia viola intensionalmente regra kona-ba kontrole ka jestaun ka aktua ho violasaun grave ba devér kona-ba nia funsaun, sei hetan pena prizaun tinan 1 too tinan 4.

Pontu, 2) Bem, interese ka servisu referidu iha númeru anteriór Estadu, pesoa koletiva ho utilidade públika, kooperativa ka asosiasaun populár nian karik, ajente sei hetan pena prizaun tinan 2 too tinan 6.

TR mós julga ho independentimente rekursu hosi Ministériu Públiku no kondena arguido João Câncio da Costa Freitas ba pagamentu indemnizasaun ba estadu RDTL ho montante USD 1.410.000,00.

Kondena mós arguido João Câncio ba pagamentu taxa judisial ho montante osan USD 200,00.

Antes ne’e, Tribunál Distritu Dili (TDD) fó sentenca ba eis Ministru João Câncio tinan 7 kadeia no selu multa, desizaun ne’e TDD foti liu husi Juiz Jose Maria Araujo, ho akuzasaun partisipasaun ekonomiku.

Tuir Tribunál Distrital João Câncio komete erru iha prosesu fornesimentu no estabelisementu Televizaun Edukasaun (TVE) tan ba la halo tuir prosedimentu normal aprovizionamentu hodi loke tender ba publiku tuir montante osan ne’ebé iha maibé ho ninia kuñesimentu halo ajudikasaun direita ba kompania Larakia husi Darwin.

Iha akordaun refere mos sita katak lala’ok eis Ministru Edukasaun iha IV Governu ne’e halo lakon osan estadu nian ho total montante US$1,410,000.00 no pertuva mós funsionamentu TVE nian. Tanba ne’e, Tribunál Distrital Dili kondena eis Ministru João Câncio Freitas tama kadeia tinan hitu no husu indemnizasaun osan ho montante USD 500,000.00 ba estadu tuir pena civil.

Tempu ne’eba  arguido João Câncio akompaña husi ninia advogado Jose M Guterres no husi Ministeiru Publiku marka prezensa, Prokuradora Lidia Soares.

Iha tempu hanesan rona tiha desizaun hodi Tribunál Distritu Dili Advogado husi parte arguido hato’o ninia rejeisaun no dehan sei halo rekursu ba Tribunal de Rekursu antes tempu loron 15 remata.

Ho rajaun ida ne’e mak juiz ba prosesu diside arguido João Câncio la hetan detensaun prizaun imediata too prosesu tranzitu en julgadu husi Tribunal de Rekursu.

Julgamentu ba kazu refere iha Tribunál Distrital Dili, akontese iha tinan 2015. To’o notisia ne’e hatun parte TATOLI seidauk halo konfirmasaun ba João Câncio ho nia advigado.

Entertantu juiz Kolektivu hosi TR ne’ebé diside “Distinu” Arguido João Câncio da Costa Freitas kompostu hosi, Deolindo dos Santos, Prezidente, Maria Natércia Gusmão, Relatora, no Guilhermino da Silva.

(Ekipa Kobertura)

Foto: João Câncio da Costa Freitas