Hosi haksolok kampaña nian to'o kalma reflesaun nian lahó kartaz sira

Hosi António Sampaio

Timor-Leste tama ona períudu reflesaun nian ba lejislativu sira loron-sabadú ne'e no símbolu di'ak hosi asaun ne'e, hafoin haksolok no festa kampaña nian, maka "outdoor" boot sira ne'ebé mamuk tanba laiha ona kartaz sira partidu nian.

Bandeira sira, kartaz sira no letra sira ne'ebé tara iha uma sira, edifísiu sira, poste elétriku sira no iha "outdoor" boot sira iha fatin oioin iha sidade lakon hanesan majia.

To'o autokolante sira ne'ebé antes tau iha parede sira ka iha poste sira hanesan lakon iha operasaun ida ne'ebé konklui durante loron-kuarta kalan no loron-kinta madrugada.

Hafoin iha loron rua ikus ne'e sidade domina ho karavana sira hosi partidu boot rua nasaun nian, Congresso Nacional da Reconstrução Timorense (CNRT) ho Frente Revolucionária do Timor-Leste Independente (Fretilin), iha loron-kinta ne'e Díli hetan fali normalidade sidade nian.

Bele haree ona sinal sira katak hahú ona movimentu boot ba votu. Kalkula katak metade hosi eleitor timoroan sira sei halo viajen hodi ba vota iha loron-sábadu ne'e iha zona ka fatin sira iha aldeia.

Maski iha tempu barak hodi muda sira nia resenseamentu, ema barak la halo ka hili hodi la halo no, tanba ne'e, Díli - sidade ida ne'ebé sai nafatin hanesan rezervatóriu hosi timoroan sira ne'ebé mai hosi fatin oioin - sei mamuk duké baibain iha loron hirak tuirmai ne'e.

Tanba ne'e, Governu aprova ona iha semana ne'e iha Konsellu Ministru sira toleránsia pontu ba loron-sesta hodi permiti ba eleitor sira hodi halo viajen ba munisípiu sira ne'ebé sira halo resenseamentu.

Fatin úniku ne'ebé sei iha restu hosi kampaña nian maka iha rede sosial sira, ne'ebé labele mantén horáriu sira no publikasaun sira ho imajen hosi komísiu ikus sira sei fahe nafatin.

Foto sira ne'ebé hatudu multidaun ne'ebé maka Partido Libertação Popular (PLP) halibur iha aeroportu Baucau (sidade boot daruak), bainhira taka nia kampaña iha loron-kuarta, ka ida ne'ebé hatudu Fretilin bainhira taka nia kampaña iha Díli, iha loron hanesan.

Apoiante sira hosi partidu rua ne'e temi "tsunami" ba apoiu nian.

Maski lahó kampaña, ajitasaun hosi sidade ida ne'ebé sei ba votasaun iha loron-sábadu bele haree iha fatin seluk, iha Sekretariadu Tékniku ba Asisténsia Eleitoral (STAE) no iha Komisaun Nasional ba Eleisaun nian (CNE) no ho prezensa maka'as hosi ema estranjeiru sira duké normal.

Iha fatin sira iha ona ekipa sira observador nasional ho internasional sira, inklui ekipa boot ida hosi Uniaun Europeia, ekipa sira hosi organizasaun sira norte-amerikanu nian National Democratic Institute (NDI) ho International Republican Institute (IRI), hosi organizasaun oioin sira australianu nian no mós hosi grupu diplomátiku ne'ebé autorizadu iha Díli.

Entre observador sira iha eurodeputadu na'in lima, inklui portugés sira Ana Gomes ho Ináci Faria, no deputada baska Izaskun Bilbao Barandica, ne'ebé lidera misaun hosi observasaun europeia nian.

Iha ona eleitor hamutuk 764.858 maka resenseadu hodi vota, entre sira na'in 1.101 iha Austrália, na'in 589 iha Portugal, na'in 208 iha Reinu Unidu ho na'in 227 iha Koreia-Súl.

Autoridade eleitoral timoroan sira sei instala ba votasaun lejislativu estasaun votu nian hamutuk 1.121 iha sentru votasaun nian hamutuk 859 ne'ebé pelumenus hitu sei funsiona iha estranjeiru, iha Austrália (Darwin, Sydney ho Melbourne), Koreia-Súl, Portugal ho Reinu Unidu.

Besik metade hosi eleitor sira tenki halo viajen ba fatin sira seluk iha nasaun nian iha loron votasaun nian, haktuir hosi estimativa hosi autoridade eleitoral sira.

Urna sira sei loke entre tuku 07:00 to'o tuku 15:00 oras lokal iha loron-sábadu (tuku 23:00 loron-sábadu no tuu 07:00 loron-domingu, oras Lisboa nian).

SAPO TL ho Lusa | Foto@ Nuno Veiga/EPA