Deputadu Terseira lejislatura La Kumpri Promesa

DILI – Sosiadade sivil iha rai laran konsideira Parlamentu Nasional iha terseira lejislatura bosok maka barak ou la kumpri promesa, tanba mandate hotu ona sira lakonsege halo diskusaun ba lei anti korupsaun.

Tuir membru ONG Ajar Inocensio Xavier hateten, komprimisiu ba hamosu lei anti korupsaun to agora mandate besik hotu ona, maibe deputadu terseira lejislatura seidauk aprova lei nee, nee hatudu katak, sira laintegridade no bosok ten.

“Se kolia buat ida o lahalo buat ida nee o laiha integridade, entaun deputadu sira iha terseira lejislatura nee laiha integridade, atu halo diskusaun ba lei atu kombate korupsaun,” dehan Inocensio ba STL, iha nia servisu fatin, Farol, Dili, Sesta (21/07/2017).

Nia dehan, Dedsde tinan 2012 sira kampania dehan kombate korupsaun, hamosu tiha instituisaun KAK, depois lahamosu lei, entaun intensaun saida.

Portantu hamosu instituisaun nee hanesan kurtina deit, para foka ba mundu katak, Timor Leste iha ona komisaun ida ba kombate korupsaun, mais implementasaun lafo poder atu komisaun nee halo nia servisu.

Iha fatin ketak Diretor ONG Gertak Faustinho Magno hateten, Mandatu Parlamentu Nasional iha terseira lejislatura besik remata ona, maibe sira lakonsege aprova lei anti korupsaun, tanba nee husu ba membru PN foun mai atu tau prioridade ba lei ida nee, dehan Faustinho. Carme Ximenes/EST2

Suara Timor Lorosae