sexta-feira, 11 de agosto de 2017

Governu Bele Forma ho Minoria Parlamentár

DILI: Partidu rua ona mak halo reuniaun ho partidu mais votadu, FRETILIN, maibé rezultadu husi enkontru rua ne’e hotu-hotu ‘negativu’. Seidauk iha ida mak hatudu ninia votade hodi la’o hamutuk forma governu foun.

Maski nune’e, FRETILIN seidauk lakon esperansa. Tanba fiar iha ai-knanoik ida katak, “iha dalan barak atu ba Roma”. Ne’e duni, partidu mais votadu ne’e bele kaer ba esperiénsia formasaun governu iha nasaun seluk ho minoria parlamentár.

Sekretáriu Jerál FRETILIN, Mari Alkatiri hateten, opsaun atu forma governu ne’e ne’e iha maneira barak atu forma. Tanba ne’e, sei iha tempu atu lider sira tuur hamutuk hodi forma governu.

Nia fó ezemplu, esperiénsia iha rai Portugál ne'ebé hatudu ona katak governu ida ne'ebé forma ho governu minoria iha parlamentu nasionál, maibé governu ne’e metin tanba iha parlamentu nasionál partidu rua seluk ajuda hodi asegura estabilidade governativa.


 “Tanba ne’e, partidu FRETILIN fiar katak sei forma governu, tanba ne’e labele dudu ba fali partidu seluk hodi forma governu”, Alkatiri hafoin soru-mutu ho delegadu Partidu Libertasaun Popular (PLP). Iha Hotel Novo Turismo, horisehik.


Ne’e duni, apela ba povu tomak atu hakmatek hodi hein rezultadu negosiasaun ne'ebé ohin loron halo no husu atu respeitu nafatin lideransa antigu sira.

Reuniaun ne’e, delegasaun PLP mantein nafatin pozisaun ba opozisaun iha Parlamentu Nasionál, maibé Sekjer FRETILIN kontente, tanba hatudu hela sinál pozitivu ruma hodi lakohi atu mosu eleisaun antesipada.

Alkatiri dehan, PLP rasik la aseita atu mosu eleisaun antesipada signifika sira hakarak kontribui ba estabilidade nasionál no rekoñese partidu FRETILIN ne'ebé manan iha eleisaun parlamentár ne’e.

“Sira hakarak opozisaun ami kontente, tanba sira lakohi eleisaun antesipada” tenik nia.

Iha fatin hanesan, Prezidente PLP, Taur Matan Ruak hateten, sira nia pozisaun mantein nafatin iha opozisaun, maibé la konkorda atu iha eleisaun antesipada.

Prosesu ne’e sei la’o ita sei haree sira seluk ne'ebé sei mai. Buat hotu partidu mais votadu mak sei hatene hodi halo servisu hamutuk ho partidu sira seluk hodi halo oinsá”, dehan nia.

Maski desizaun ne’e seidauk foti liu husi konferénsia ida, maibé dalan mak ida ne’e ona. Partidu foun ho kadeira ualu (8) ne’e sei konsistente nafatin ho ninia pozisaun.

“Hanesan ha'u ko’alia dala barak ona iha públiku katak, ha'u la'ós buka servisu, ema seluk mak mai buka servisu karik”, tenik Taur.

Nia hatutan, partidu haat hanesan CNRT, PLP, PD no KHUNTO sai hanesan feto bonita ida. Tanba ne’e, konforme partidu manan maioria simples mak fihir halo koligasaun hamutuk hodi forma VII governu, maibé labele konta ho PLP, tanba hili ona dalan opozisaun.

Antes ne’e, partidu FRETILIN halo ona enkontru ba partidu segundu mais votadu CNRT, maibé seidauk iha rezultadu. Partidu ne’e sei lori ba Komisaun Polítika Nasionál hodi deside sira ninia pozisaun.

Entretantu, planu tuir mai, FRETILIN sei halo reuniaun ho Partidu Demokrátiku (PD) no KHUNTO hodi husu mós sira ninia prontidaun ba formasaun governu.

Jacinto Xavier | Independente

Sem comentários: