Híbrido de Timor Selebra Tinan 90

DILI, (TATOLI) – Ministru Estadu Koordenadór Asuntu Ekonómiku (MEKAE) no Ministru Agrikultura no Peska (MAP), Estanislau Aleixo da Silva hatete Híbrido de Timor, ohin loron selebra tinan 90 ba deskobrimentu peritu sira-nian kona-ba híbrido iha rai-laran.

“Híbrido ne’e ohin loron utiliza iha rai barak, halo filafali renovasaun ba sira-nia kafé rasik tanba híbrido ne’e rezistente ba moras ida ne’ebé hamate kafé  iha rai Sri Lanka ho Kolómbia ho moras ida bolu naran Hemileia Vastatrix, fungu ida ne’ebé hamate kafé”, Estanislau informa iha Palásiu Governu foin lalais ne’e.

Híbrido iha Timór ne’e identifika husi sientista portugés iha tempu ne’ebá katak kafé balun ne’ebé mate no iha balun lamate, no iha Timor-Leste iha kafé hun ne’ebé rezistente ba moras kafé nian, nune’e sientista sira halo kruzamentu kafé hun rua mak arábika no robusta ne’ebé oras ne’e nia germoplasma (fini) iha hela Instituto de Investigação Científico Tropical (IICT) Lisboa, iha Oeiras.

“Depois estudu ida avansadu liu, tuir prosesu selesaun ohin loron ita-nia kafé híbrido. Ha’u fiar katak Governu foun mai sei servisu halo di’ak para depois lori fali buat ida bolu germoplasma kafé Timór nia híbrido ne’e lori husi Portugál mai fali Timór”.

Estanislau dehan tékniku sira hakarak atu haruka germoplasma híbrido maibé presiza harii kondisaun no sei servisu hamutuk ho Instituisaun Kafé Timór  oinsá  mak harii kondisaun atu lori germoplasma ne’e mai fali Timor-Leste tanba liuhusi sentru ne’e, ohin loron bele fahe híbrido ne’e ba rai barak.

“Ne’e duni tinan ida ne’e, tinan ida ne’ebé importante ba produtór kafé sira-nian, tinan ida ne’ebé Timór tenke orgullu”.

Estanislau hatutan, kafé Timór ida ne’e rezistente ba moras sira ne’ebé hamate iha rai barak. “Ita-nia kafé Timór di’ak tebes, presiza hadi’a nia kualidade no halo marketing ida di’ak depois nia presu bele aas, ita bele kompete iha merkadu nixu”.

Tuir peskizadór no dosente Universidade Nasionál Timor Lorosa’e (UNTL), Fakuldade Agrikultura, Departamentu Agronomia, Lúcio Marçal Gomes relata, iha 1917-1927 bainhira xá no kafé kona ferrujen no iha tempu ne’ebá, ai-horis rua ne’e afeita no ema hotu dezanima tanba laiha dalan seluk atubele hetan solusaun hodi rezolve, peskizadór sira la’o to’o iha Timor-Leste no haree katak iha Timor-Leste ai-horis ne’e hetan mós ferrujen.

“Maibé kuandu sira to’o iha aldeia Mata Nova, suku Fatubesi, postu administrativu Hatolia, munisípiu Ermera, iha fatin ki’ikoan ida naran malus fuik ne’ebé moris hela kafé hun rua, ida naran arábika no ida fali naran robusta, depois haree, moras ne’e lakona entaun peskizadór sira tenta no halo kruzamentu entre kafé arábika no robusta”.

Tuir siénsia ne’ebé iha, arábika iha kromosoma 44 no robusta iha 22, labele halo kruzamentu tanba iha diferensa ida ne’ebé dook. “Maibé natureza Timór nian, grasa Maromak nian buat rua ne’e bele kruza hodi hetan nia oan no hanaran kafé “Hibrido de Timor”, Lúcio dehan.

Kafé “Hibrido de Timor” komesa iha 1927 ema haree katak nia bele reziste kona-ba moras ida ne’ebé mundu tomak tauk. Ho prosesu tinan 30 iha Timór de’it, inan hun boot iha Mata Nova, peskizadór sira halo viveiru iha Raimera depois halo tan viveiru iha Brigada-Fatukeru, atu koko de’it katak moris ka la’e?

Akompaña prosesu durante tinan 30 (1927-1957). Husi ida ne’e, peskizadór sira haruka kafé kilo lima liuhusi Sociedade Agrícola Pátria de Trabalho (SAPT), iha tempu portugés, tanba kompañia ne’e mak boot iha Fatubesi, atu halo esportasaun kafé Timór ba Portugál, entaun submete mós kafé Timór iha loron 8 Agostu 1957.

“Haruka kafé ne’e ba no simu husi profesór ida ne’ebé mós hanesan Presidente do Instituto de Investigação Científico Tropical (IICT) Lisboa, iha Oeiras. Fatin ida ne’e, hanesan fatin ba peskizadór ferrujen. Nia tau kafé ne’e iha green house no lakuda ba rai maibé tau iha vaju boot atu haree ninia rezisténsia, tanba iha Timór ne’e trópiku muda ba Portugál sub-trópiku, rai ida ne’ebé malirin tebes atu haree de’it nia rezisténsia maibé grasa Maromak nian kafé ne’e reziste nafatin”, peskizadór ne’e relata.

Nune’e iha 1960 kafé ida ne’e mak sira fahe ba sentru sira iha nasaun produtór kafé Ángola, Mosambike, Brazíl, Kosta Rika, Kolómbia inklui fahe mai to’o Indonézia no to’o ohin loron nasaun produtór hamutuk 50 iha mundu nia kafé inan mak kafé “Hibrido de Timor”. 

Jornalista: Maria Auxiliadora | Editora: Rita Almeida

Foto: Peskizadór no dosente UNTL, Lúcio Marçal Gomes haree amostra Hibrido de Timor iha Instituto de Investigação Científico Tropical (IICT) Lisboa, iha Ouiras hamutuk ho investigadór Eng.º Vitor Barzea. Foto/Google.