Opsaun Rua Ba Reforma Lejislativa

DILI, (TATOLI) - Komisaun Reforma Lejislativa (KRL) divulga ona relatóriu espesializadu opsaun legál no institusionál périodu 2017-2022 nian, ba faze implementasaun polítika no estratéjia reforma lejislativa ba périodu 2017-2022.

Tuir relatóriu ne’ebé Ajénsia Tatoli, asesu ohin sita katak KRL hamosu rekomendasaun rua hanesan aprovasaun opsaun rua ba faze implementasaun polítika no estratéjia reforma lejislativa ba périodu 2017-2022.

Seluk, rekomenda katak relatóriu ne’e iha ligasaun ho proposta polítika no estratéjia reforma lejilativa ba périodu ne’e.

Relatóriu ne’e divulga katak rekomendasaun ne’e mosu tanba bazea ba konkluzaun rua ne’ebé KRL rasik aprezenta.

Ida, opsaun rua ne’e rekomenda tanba karaterizada ba vantajen hitu hanesan iha baze esperiénsia insisiál KRL no refleta funsaun principal no atributu rasik husi komisaun reforma lejislativa maske ho nia espesifisidade, dezenvolve esperiénsia ne’e ba planu lejislativu ida no institusionál ne’ebé adekuadu liu ba implementasaun polítika, estratéjia no reforma lejislativa no setór justisa ba périodu 2017-2022.

Tuir mai, permite monitoria, observasaun no peskiza nesesária ba ezekusaun, koordenasaun, avalisaun no reformasauna ba reforma ne’e, fó indepedénsia no kapasidade atuasaun transversal no multidisiplinár nomós aliña KRL ho objetivu governu no polítika estadu nian.

Inklui, tau konsiderasaun ba esperiénsia di’ak sira no prátika reforma lejislativa internasionál, espesialmente iha ita-nia rejiun no atende ho espesiál ba konsesaun sira iha pós-modernidade relativamente ho funsaun reforma lejislativa.

Rua, opsaun rua koresponde ba buat ne’ebé ita nota hanesan karaktéristika emerjente husi esperiénsia inisiál ne’ebé mak atuál tanba konsagrasaun lejislativa.

Entretantu, iha relatóriu KRL espesializadu opsaun legál no institusionál périodu 2017-2022 nian ne’e akresenta pontu importante hanesan introdusaun, objetu no ámbitu, KRL: modelu evolusaun ida, análize komparativa husi selesaun juridisaun nasionál ida no nasaun seluk.

Nune’e mós kona-ba kestaun pertinente no resposta sira: Análize iha fase opsaun proposta (opsaun 2-modelu emerjente) inklui konkluzaun no rekomendasaun ne’e rasik.

Relatóriu espesializadu opsaun legál no institusionál périodu 2017-2022 nian divulga ona iha portal ofisiál komisaun ne’e rasik www.crl.tl ho lian ofisiál, tetun no portugés inklui lian serbisu nian, inglés.

Jornalista: Rafy Belo | Editór: Manuel Pinto