KI Identifika Infrasaun Balansu iha Publikasaun Mídia

DILI, (TATOLI) – Prezidente Konsellu Imprensa (KI), Virgílio da Silva Guterres informa observasaun KI durante kobertura mídia iha eleisaun parlamentár identifika infrasaun ba balansu (cover both sites) tanba laiha konfirmasaun ho fonte sira ne’ebé sai objetu krítika husi fonte seluk.

“Porsaun kobertura, mídia balun fó kobertura barak liu ba partidu balun”, hateten Prezidente KI liuhusi konferénsia imprensa iha edifísiu KI Kintál Boot, ohin.

Mídia fó espasu barak liu ba partidu boot no laduun fó oportunidade ba partidu ki’ik sira. Nune’e mós ba publisidade, boot tebes ba partidu sira ne’ebé mak iha rekursu finanseiru maka’as.

Tanba asuntu ne’e seidauk iha lei hodi regula publisidade partidu polítiku, KI foti hanesan referénsia hodi kontinua sai baze advokásia atu rekomenda ba governu no parlamentu lejislatura foun atu haree, halo revizaun ka hamosu lei ne’ebé bele regula.

Ho kestaun sira ne’e, presiza konsellu redasaun ida ne’ebé forte no indepéndente husi influénsia hothotu iha kada kanál mídia atu garante lia loos no públiku nia direitu ba asesu informasaun.

Alende ne’e presiza espasu hanesan ba parte hotu ne’ebé sai objetu ba produtu jornalístiku kanál mídia sira nian atu kumpri prinsípiu universal jornalístiku mak balansu.

Iha sosializasaun kontinua kona-ba kódigu étika jornalístika no lei komunikasaun sosiál ba jornalista timoroan sira, nune’e bele evita konsekuénsia no risku legál iha futuru.

Inklui, mídia ka jornalista sira presiza estabelese editor club ida atu asegura no garante kualidade produtu jornalístiku.

Entretantu, rezultadu análize ne’ebé KI aprezenta iha oin rua hanesan rezultadu análize kualitativu no rezultadu análize kuantitativu.

Rezultadu análize kualitativu mak kobertura iha eleisaun périodu parlamentár mak mídia hotu fó espasu ba partidu polítiku sira hotu hato’o programa no plataforma polítika.

Entretantu, notísia sira iha périodu eleisaun parlamentár mak KI monitoriza no análize katak infrasaun barak liu ne’ebé jornalista no kanál sira komete mak infrasaun hasoru kódigu étika pontu 6 no prinsípiu universál jornalístika cover both sides no kódigu étika pontu 2 tanba notísia barak la iha objetividade tanba konsidera jornalista hatama mós opini iha notísia.

Publisidade iha périodu eleisaun parlamentár mak espasu publisidade, partidu ki’ik sira laduun hetan espasu enkuantu partidu boot hanesan CNRT, FRETILIN, PD no PLP domina liu tanba kapasidade finanseiru boot.

Rezultadu análize kuantitativu mak monitorizasaun ba notísia/programa kampaña partidu polítiku iha mídia imprime durante fulan ida (la inklui Bussiness Timor, Tempo Semanál no Matadalan).

Suara Timor Lorosa’e (STL) dala 239 (25%), Diário Nacional dala 91 (20%), Timor Post dala 351 (37%), Indepedente dala 138 (14%) no Timoroman dala 136 (14%).

Tuir mai, rezultadu monitorizasaun ba publikasaun advertoriál/publisidade profile ka programa partidu polítiku iha mídia imprime durante fulan ida laran.

Suara Timor Lorosa’e (STL) dala 150 (40%), Diário Nacional dala 14 (4%), Timor Post dala 132 (36%) no Indepedente dala 173 (20%).

Rezultadu monitorizasaun ba publikasaun notísia kona-ba partidu sira, entre partidu 21, media halo publikasaun maioria liu ba CNRT dala 78 (24%), FRETILIN dala 81 (25%), PLP dala 45 (14%), PR dala dala 56 (17%), PD dala 36 (11%), UDT dala 14 (4%) no PDN dala 13 (4%).

Jornalista: Rafy Belo | Editora: Rita Almeida

Foto: Prezidente Konsellu Imprensa (KI), Virgílio da Silva Guterres bainhira halo konferénsia imprensa. Foto: Media KI.