terça-feira, 8 de agosto de 2017

Volume Estudantes Tuir Aula Depende Ba Merenda Escolar

Merenda escolar sai fator determinante ba iha prezensa estudantes nian iha aula hodi tuir prosesu aprendizajen, atrai labarik sira tama eskola ho regularmente.

Koordenador Ensino Baziku Filial Rumbia, Abilio Pereira da Conçeicão hateten iha fulan neen liu ba (Janeiru-Junho) frekuensia estudantes iha aula tuun maka’as, liu –liu barak mak falta tanba laiha merenda eskolar.

Tanba ne’e, nia sujere programa merenda eskolar tenke kontinua, tanba bainhira para fo impaktu bo’ot tebes, ida ne’e bele kauza sira bele repete tan klase.

“Merenda eskolar ne’e hanesan besi asu hodi dada labarik sira mai eskola, tanba ita hatene familia ida-rua, han dala ida ou dala rua iha loron ida entuan ajuda tebes labarik sira mai eskola frekuentemente,” nia hateten, iha Kaikoli, Dili.


Nia hateten, tinan ne’e merenda eskolar tarde tanba transformasaun desentralizasaun, presiza prosesu administrasaun, maibe ba tinan sira mai laiha ona razaun e tenke implementa iha inisio tinan.

Nia informa, hahu fulan Julhu merenda eskolar hahu hikas fali tanba osan sai ona, maibe governu seidauk distribui fos hodi tein ba estudante sira.

“Ami bele sosa fos, maibe laiha ona ekilivre ou balansu nutrisaun, tanba osan ne’e alokadu ba sosa modo, e fos laiha entaun osan ne’e tenke fahe hodi sosa fo’os mos,” nia hateten.

Total estudante iha EBF Rumbia hamutuk nain 801 no loron ida gasta $190, 75 hodi kompras fos, modo no aifuan hodi fornese ba iha labarik sira.

Nia mos, hatutan merenda eskolar la’os foin hahu, maibe iha tempu Portugues to’o Indonesia programa ne’e la’o ona no la’o ho diak tanba organizadu.

Iha parte seluk, Jerente programa Timor –Leste Coalition For Education (TLCE), Matias dos Santos duvidas ho servisu Ministerio Edukasaun nian, ne’ebe to’o agora seidauk rezolve merenda eskolar.

Nia hatutan, iha tinan kotuk Ministru Edukasaun Antonio da Conçeicão deklara sei uza produtu local hodi fornese ba iha alunus, maibe realidade laiha.

“Fos toneladas iha armagen Tibar ne’eba ne’e atu halo saida, nusa la distribui ba merenda eskolar,” nia kestiona.

Tanba ne’e, nia parte sujere governu foun atu haree fali politika programa ne’e, tanba merenda eskolar ne’e la’os atu fo han deit alunu sira, maibe haree mos ba iha balansu nutrisaun.

Paulina Quintão | The Dili Weekly

Sem comentários: