terça-feira, 8 de agosto de 2017

Solar Panel Mak Energia Alternativu iha Timor–Leste

PARTILHAR
Xefe suku Lausi, Adelaide de Carvalho hateten solar panel mak hanesan energia alternativu ida ba populasaun iha Timor –Leste, liu –liu sira ne’ebe iha area remotas, tanba barak seidauk asesu eletrisidade.

Nia dehan, iha aldeia Erabuti suku Lausi munisipio Aileu, komunidade uma kain 47 hili opsaun uza solar panel hodi hala’o servisu iha tempu kalan, liu –liu ba labarik sira atu estuda, tanba eletrisidade seidauk tama to’o iha sira.

Nia informa, total populasaun ne’ebe hela iha aldeia Erabuti hamutuk 320 no sira hili sosa solar panel uza.

Tanba ne’e, nia sujere ba governu atu ajuda solar panel ba komunidade sira ne’ebe hela iha area remotas liu no do’ok husi sidade, e sira mos iha direitu atu hetan naroman iha tempu kalan.

“Agora dadaun, komunidade sira ne’e sosa solar panel ne’ebe Cineza sira fa’an ne’e mak sira uza hela,” nia hateten via telephone.


Energia alternativa ne’e, nia dehan komunidade sira so bele utilize iha oras balun deit tanba kapasidade ne’ebe ki’ik.

Nia informa, liu –liu aldeia Erabuti ne’e area ida ne’ebe izoladu tebes, la besik estrada no sira tenke hakur mota atu mai iha vila hodi halo atividade negosio ruma.

Hanesan lideransa local, nia dehan sira hato’o ona karta ba iha nasional hodi ajuda solar panel ba komunidade sira ne’e no ekipa husi governu halo ona survey, maibe seidauk iha rezultado.

Iha tinan 2003, governu halo kooperasaun ho kompania international balun hodi halo instalasaun solar panel ba iha komunidade area rural sira nia uma inklui fasilidade publiku hanesan sentru saude, postu saude, eskolas tanba eletrisidade labele to’o iha ne’eba.

Tama tinan 2010, governu hahu investe no dezenvolve sistema energia konvensional hodi distribui eletrisidade ba iha teritorio tomak, maibe komunidade balun uza solar panel.

Entretantu, Membru komisaun E (infra-estrukturas, transporte e komunikasaun), Manuel de Castro Pereira hateten projetu instalasaun solar panel ne’e bele kontinua, maibe presiza halo estudu fila fali tanba maioria komunidade asesu ona ba eletrisidade.

Nia hateten, Timor –Leste sei presiza nafatin solar panel tanba populasaun hela iha area urbana, ida –idak hela tuir sira nia hakarak no barak mak hakarak hela iha sira nia moris fatin entaun iha foho tenke instala duni solar panel.

“Ba komunidade sira ne’ebe hela grupo (ida deit) no do’ok ne’ebe eletrisidade labele tama,” nia hateten.

Nia sujere, ba governu foun atu kontinua instala solar panel ba komunidade sira nia uma, tenke iha koordenasaun ho xefe suku sira, nune’e labele gasta orsamentu arbiru deit.

Nudar Membru Parlamentu Nasional ne’ebe halo knar ba fiskalizasaun, hateten sira iha konesementu kona ba projetu solar panel, maibe laiha relatoriu ida husi governu kona ba projetu ida ne’e.

Paulina Quintão | The Dili Weekly
PARTILHAR

Author: verified_user

Publicação luso-timorense sem fins lucrativos

0 comentários: