sexta-feira, 15 de setembro de 2017

Normal Fretilín Ukun Ho Minoria

DILI (TATOLI) – Eis Prezidente Repúblika, Jose Ramos Horta konsidera VII governu ne’ebé lidera hosi Sekretáriu Jerál Fretilín ho kondisaun minoritáriu normal tanba iha mundu mós akontese ona nune’e.

“Ha’u koñese rai barak hanesan iha Eropa eh Béljika dala ruma iha tinan ida nia laran la konsege forma governu, enkuantu Timor-Leste bele akontese nune’e maibé buat ida baibain,” Ramos Horta kompara, foin lalais ne’e, iha Palásiu Prezidente da Repúblika, Bairru Pité, horseik.

Nu’udar fundadór nasaun Timor, Ramos observa katak, Kompetente no Justu tebes iha biban sira ne’ebé liu ba hodi partidu Fretilín nu’udar mais votadu halo negosiasaun hodi forma VII governu.


Hodi kompara tan katak, esperiénsia nasaun España, sira eleisaun dala rua eh dala tolu kedan hafoin sira ou partidu hetan maioria mak forma governu ida.

Interesante tebes mak iha períodu negosiasaun partidu balun presaun no bele hakiduk, maibé ida ne’e mak hanaran polítika.

Ho nune’e nia fó hanoin iha polítika situasaun presaun bele mosu maibé importante mak tenke hatudu ran malirin, laran luak hodi Timor-Leste ho situasaun ne’ebé trankuilu.

Iha parte seluk Prezidente Repúblika Francisco Guterres Lu-Olo ohin (Sesta) sei halo diskursu iha parlamentu nasionál ba abertura sesaun solene IV lejizlatura ne’ebé lidera hosi Prezidente Parlamentu Nasionál Aniceto Guterres (Kuadru Comete Central Fretilín) hafoin ne’e iha loro kraik, Lu Olo sei fó tan pose ba Sekretáriu Jerál Fretilín Mari Alkatiri nu’udar xefe governu ba VII Governu Konstitusionál.

Jornalista: Zezito Silva | Editór: Manuel Pinto

Sem comentários: