Governu timoroan ba dala VII simu pose ho fatin balun sei mamuk

Iha loron-sesta ne'e, Prezidente timoroan, Francisco Guterres Lu-Olo, fó pose ba elementu na'in 12 hosi Governu konstitusional dahitu, ne'ebé lidera hosi Mari Alkatiri no ne'ebé nia kompozisaun final sei hatene iha semana hirak tuirmai ne'e.

Serimónia pose ne'e hala'o iha Palásiu Nobre Lahane, iha Díli, ne'ebé elementu sira hosi elenku governativu halo juramentu.

Lu-Olo hatete ona katak kompozisaun hosi Governu "tenki haree ba oinsá maka povu vota ona no rezulta hosi akordu entre partidu polítiku sira ne'ebé iha fatin iha Parlamentu Nasional", liuliu Frente Revolucionária do Timor-Leste Independente (Fretilin) ho Partidu Demokrátiku (PD), ne'ebé asina ona akordu koligasaun Governu nian.

"Sidadaun sira konfia ona nia votu ba partidu oioin: ne'e hanesan normal, iha demokrasia. Hanesan responsabilidade hosi partidu sira hodi buka solusaun sira, hodi garanti funsionamentu estável hosi instituisaun sira, no hametin implementasaun estável no lalais hosi planu sira dezenvolvimentu sosial no ekonómiku nian - planu sira ne'ebé partidu sira rekoñese hanesan nesesáriu no ne'ebé, iha kazu barak, hanesan proposta ne'ebé koñese ona ka aprova tiha ona", Lu-Olo hatete.

Xefe Estadu fó hanoin katak baze sira ne'ebé uza hodi hili membru sira Governu nian, hanesan méritu, proporsionalidade, igualdade jéneru ho avaliasaun "ho baze iha efisiénsia hosi implementasaun nian".

"Koligasaun ne'ebé apoia governu konstitusional dahitu bazeia iha prinsípiu sira ne'ebé Fretilin ho Partidu Demokrátiku konkorda ona. Agora daudaun, bainhira ha'u fó pose ba señór Primeiru-Ministru Dr. Mari Alkatiri no ministru importante sira governu nian, hanesan importante subliña nia kompromisu hodi garanti estabilidade governativu", nia hatutan.

Prezidente timoroan felisita "sentidu dever" hosi membru sira ezekutivu ne'ebé nia esperiénsia ho koñesimentu "hanesan kontributu importante hodi hametin sentimentu konfiansa hosi sosiedade iha funsionamentu sira instituisaun nian".

Kona-ba partidu sira hosi koligasaun, Lu-Olo hatete katak nia partisipasaun no kontributu hanesan "nesesáriu ba estabilidade no dezenvolvimentu Timor-Leste nian" ne'ebé alarga ba modelu ida, ne'ebé inklui "apoiu hosi insidénsia parlamentar, rona sentimentu hosi sidadaun sira no diálogu, bainhira presiza, ba harmonia sosiedade nian".

Iha diskursu, Lu-Olo refere ona ba kompromisu ne'ebé koligasaun asumi, liuliu "garanti dezenvolvimentu ekilibradu, sustentável, hosi munisípiu sira no hosi rejiaun oioin", "garanti no hametin tranzisaun hosi jerasaun sira" no "kombate maka'as korupsaun, koluzaun no nepotizmu".

Kompromisu sira ne'e "koresponde ba nesesidade nasaun nian" no, bainhira hanesan baze hosi governasaun nian, bele halo nasaun avansa, konsege hetan apoiu adisional sira hosi forsa polítika sira seluk no hosi sosiedade sivil", nia hatete.

Hetan ona dame no estabilidade, hanesan importante "hadi'a di'ak liután edukasaun, saúde ho kualidade hosi serbisu sira seluk Estadu nian", avansa iha implementasaun hosi planu sira dezenvolvimentu nian no iha kombate ba pobreza, hametin ekonomia no kondisaun moris hosi populasaun nian, nia destaka.

Tanba ne'e, presiza "unidade nasional", buka "hetan dalan di'ak sira hodi hametin estabilidade no la'o ba oin, ba dezenvolvimentu", nia afirma.

Ba primeiru-ministru foun, Mari Alkatiri, Lu-Olo fó hanoin katak hanesan ba dala rua maka lidera Governu, kargu ne'ebé lori "esperiénsi maka'as no kapasidade".

"Governu nia knaar hanesan ezijente tebes: tenki ajuda nasaun, iha tinan lima oinmai, hahú hakat boot ida hosi nasaun ida ho pobreza maka'as, ba nasaun ida ho rendimentu médiu-aas, lahó kiak, ho ekonomia diversifikadu no sustentável ida", nia hatete.

"Buat ne'ebé maka halibur ida hanesan boot liu no importante liu duké buat sira ne'ebé haketak ita. Maski iha diferensa sira, ita bele kopera ba Timor-Leste ida ne'ebé prósperu no ksolok liután", Lu-Olo afirma no kompromete ona hodi kolabora "hodi tulun hamenus diferensa sira no hakbesik ba ema timoroan sira".

Governu dahitu hahú nia mandatu iha loron-sesta ne'e, to'o tinan 2022, maski ho parte balun ne'ebé maka sei koñese, kalkula katak sei inklui iha total ministru na'in 30, visi-ministru sira no sekretáriu Estadu sira.

SAPO TL ho Lusa