sexta-feira, 15 de setembro de 2017

Prezidente Bankada PLP Sei Uza Veíkulu Parlamentár

DILI, (TATOLI) – Xefe Bankada hosi Partidu Libertasaun Populár (PLP), Fidelis Magalhães hatete, prontu simu nafatin veíkulu parlamentár hodi uza ba servisu atu bele atende interese nasionál.

“Kuandu kareta hola ona, ami prontu simu nafatin maibé bazeia ba desizaun hosi Parlamentu Nasionál, kareta iha eh la’e ne’e la importante, pertinente mak meiu oinsá mak ami mai servisu ne’e”, dehan Fidelis ba ajénsia Tatoli foin lalais ne’e via telefonema.

Nia afirma, kareta iha eh laiha, la importante, lalika diskute kona-ba transporte, saida mak bele uza hodi servisu. “Eskolla ha’u nian hodi lori motor mai servisu, ha’u ladun preokupa transporte ho modelu saida”.


Ba dignidade nu’udar deputadu ne’e iha, tanba aspirasaun povu atu ba halo servisu la’os atu sa’e kareta eh sa’e motor.

“Ami toman ho ami nia kustume tanba ne’e ami la tau ba preokupasaun atu uza veíkulu saida”, afirma. “Eskolla ne’ebé ha’u halo nu’udar prezidente bankada kona-ba veíkulu la importante maibé kualidade servisu, halo polítika di’ak ba interese nasionál no apoiu funsionamentu bankada”.

Atu hatudu dignidade la’os deputadu tenke mai sa’e kareta di’ak, hanesan Xefe Bankada saida mak importante ba servisu bankada nian.

Jornalista: Zezito Silva | Editora: Rita Almeida

Sem comentários: