sábado, 2 de setembro de 2017

Prezidénsia Meza PN, FRETILIN no PLP La Konsege Konsensu

DILI, (TATOLI) - Enkontru Tékniku entre  partidu FRETILIN no Partidu Libertasaun Popular (PLP) iha Hotel Novo Turismo, Lecidere, Dili, sábadu dader ohin, la konsege konsensu, tan ne´e partidu rua refere sei avansa ho ida-idak nia kandidatu mesak iha eleisaun ba Prezidenti Parlamentu Nasionál (PN), Tersa (05/9).

Razaun la konsege konsensu tanba partidu rua ne´e defende ida-idak nia kandidatu ba Prezidenti Parlamentu Nasionál. FRETILIN hakarak meza Parlamentu lidera hosi FRETILIN tanba partidu mais votadu. Enkuantu, PLP hakarak PLP maka lidera tanba hola parte iha koligasaun.

“Ami hanoin katak iha 5 Setembru maka ami avansa iha Parlamentu Nasionál,” Adjuntu Sekretáriu Jerál Partidu FRETILIN, José Reis hato´o informasaun ne´e ba jornalista sira hafoin reuniaun tékniku hodi deside kona-ba prezidénsia meza PN.


Iha biban ne´e, Vise Prezidenti PLP, Fidelis Magalhães esplika, en-prinsípiu, bainhira harii koligasaun ida, prezidenti meza la divia ba partidu ida de´it maibé fó ba membru koligasaun hanesan PLP no KHUNTO.

 “Tanba laiha konsensu ruma kona-ba kompozisaun meza, entaun iha 5 Setembru ami sei la´o ket-ketak. FRETILIN la´o ho FRETILIN nia kandidatu no PLP mós sei la´o ho PLP nia kandidatu,” Fidelis informa.

Kona-ba sé maka partidu sei deside ba kandidatu Prezidenti PN, Fidelis hatán, sira pefere fó ba PLP maibé pesoál ne´ebé atu ba sira seidauk deside. “Prezidenti PLP espresa ninia hanoin no orienta ami nia polítika katak prezidenti meza tenki fó ba PLP para bele iha balansu ne´ebé di´ak,” nia dehan.

Antes ne´e, líder FRETILIN hateten FRETILIN hakarak Prezidenti Parlamentu Nasionál ne´e fó ba PLP anaunser Taur Matan Ruak. Seluk, FRETILIN la konkorda tanba kestaun esperiénsia.

Relasiona ho koligasaun formasaun governu, José Reis deklara, dokumentu kona-ba prinsípiu koligasaun, FRETILIN no PLP intende malu ona iha akordu ba prinsípiu. 

Jornalista: Xisto Freitas

Foto: Enkontru entre tékniku FRETILIN no PLP ba prezidénsia meza PN, ohin dader. Imajen Ajénsia TATOLI/Xisto Freitas

Sem comentários: