Amerika Fo Formasaun Ba Juis TL

DILI - Estadus Unidus Amerika (EUA) liu husi Gabineti Judisiariu husi Embaixador Amerika iha Timor Leste fo formasaun ba juis Tribunal Rekursu ho juis Tribunal Distrital Dili sira hodi aumenta tan sira nia koinesementu iha area juridiku nian.

Tuir Juis Administrador Tribunal Distrital Dili, Duarte Tilman hatete katak, formasaun neebe fo husi reprezentante estadu Amerika iha TL nee hanesan, tanba sira kada tinan iha programa kona-ba formasaun ba juis Timor oan.

“Formasaun nee halao dala 5 ona, halo iha kada tinan-tinan. Formasaun nee atu indentifika kestaun neebe importante aktual, para bele halo diskusaun hanesan lei foun ruma, artigu neebe interpreta seidauk diak, kazu neebe akontese barak iha Timor nia faila, needuni ho formasaun ida nee bele halo planu oinsa mak bele halo prevensaun,” dehan Duarte ba Jornalista sira iha Hotel Ramelau, Aimutin, Kuarta, (30/08/2017).

Nia informa tan katak Prinsipiu Tribunal laos atu julga deit ema, kondena ema, maibe oinsa kondenasaun nee, fo exemplu ba ema seluk, hodi halo aktu final sira nee.  Liliu ba iha materia importante balu koalia kona ba etika intelektual profisional, atu bele haforsa sira nia kareira.

Nunee husi formasaun nee, koalia mos konaba, juis tenke koloka nia an nee iha neebe, juis julga aktu neebe lei bandu ka lae . Por exemplo juis bele ba diskute ka lae, juis bele ba kasinu ka lae, juis bele ba festa ka lae, tanba dala ruma bele hasoru arguidu, vitima bele sai hanesan kestaun ida.

Afirma tan, sira diskute hotu kestaun sira nee, atu bele hetan solusaun. No koalia mos konaba kazu, kuandu tur hamutuk iha familia nia laran la bele koalia kona ba kazu, tenke tau profesionalidade nudar juis nian. Deskute mos lei violensia domestika, aplikasaun da pena kontajen da pena nee iha neebe. Balu dehan iha gravasaun, iha extrda ordinariu, atenuante ka agravadu hasae tan nia gastigu depois para tribunal hodi deside nia konkreta nee iha neebe.

Nunee iha formasaun nee, sira mos deskute pena de prizaun. Prizaun nee masimu ba tinan 25 deit, mais iha lei espesial ruma ka konkursu de krime ruma soma hamutuk nee nia kastigu la bele as liu ba tinan 30 mais zumenus nia aplika pena nee oinsa. Iha kestaun seluk sira deskote kona ba aplikasaun indultu, hasai imunidade se mak iha kompetensia atu responde, seluk sira deskute kona ba Krime brankamentus kapitais.

Iha fatin hanesan Juis Administrador Tribunal Distrital Baucau Afonso Carmona hateten, formasaun nee importante ba judisiariu sira, tanba atu troka esperensia ho juis sira husi Amerika no Timor.

“Programa nee laos foin primeira ves, maibe ida nee ba dala 5 ona. Tanba iha kada tinan tinan ferias judisiariu ami nian, sempre tuir formasaun hela deit. Ba pontu de vista nee, hau hanoin importante tebes, liu liu atu troka esperensia,” esplika Afonso.

Relata tan, husi formasaun no seminariu sira hanesan nee, bele loke tan sira nia hanoin, atu bele troka esperiensia ba servisu neebe durante nee sira halao. No seminariu nee sai hanesan parte importante ida. 

Terezinha De Deus | Suara Timor Lorosae