DILI,
(TATOLI) - Prezidente Partidu Libertasaun Popular-PLP, Taur Matan Ruak bolu
atensaun ba timoroan hotu katak, iha Timor-Leste buat ne’ebé la bele halo mak
viola konstituisaun RDTL, maibé buat hotu ne’ebé konstituisaun fó dalan bele
halo.
“Buat
hotu-hotu livre menus viola konstituisaun no ita nia lei, tanba ita estadu
direitu demokrátiku,” Eis Prezidente da Repúblika Taur Matan Ruak anunsia iha
nia hela fatin, Metiaut, ohin.
Hanesan
lider ba Partidu PLP ne’ebé hetan asentu iha Parlamentu Nasionál nia lá haluha
fó agradese povu ba konfiansa hotu ne’ebé fó. No promete katak PLP sei halo
esforsu hodi partisipa iha prosesu dezenvolvimentu maski la konsege integra iha
sétimu governu.
“Husu
atu populasaun sira kontinua kalma, hakmatek hodi akompaña evolusaun situasaun
sira ne’e, movimentasaun polítika hotu-hotu bele halo maibé buat ida la bele
halo mak viola regras ne’ebé estipula iha konstituisaun no lei ,” fó hanoin
tan.
Ba
militante, simpatizante, apoiante, lori estrutura PLP nia naran Taur fó
agradese, ba konfiansa ne’ebé atribui ona ba sira ho respeitu no
responsabilidade hodi halo buat hotu hodi kontinua fó kontribuisaun ba
dezenvolvimentu nasaun, asegura pás no estabilidade iha Timor-Leste.
Husu
mós ba sétimu governu atu halo ezersísiu hodi hametin estabilidade governativa
liu-liu governu tenke reúne kondisaun hodi programa no orsamentu bele liu iha
Parlamentu nasionál.
“Governu
ida ne’e minoritária, tenke servisu makas se hakarak programa no orsamentu
pasa, atu hetan apoia ne’e iha hotu ona parlamentu agora problema mak oinsá mak
bele foti sira,” Taur dezafia tan.
No
dehan, atualmente Podér polítiku iha Timor-Leste sukat haree hosi númeru votu
rezultadu eleisaun foin lalais ne’e. Partidu Fretilín mak hetan votu makas liu,
nune’e Fretilín tenke halo ezersísiu hodi garante sétimu governu.
“Governu
ida ne’e akontese buat ruma iha dalan klaran responsabilidade primeiru mak
Fretilín, tuir CNRT depois PLP,” Taur realsa.
Jornalista:
Rafy Belo | Editór: Manuel Pinto
Foto:
Taur Matan Ruak. Foto: Antonio Goncalves
Sem comentários:
Enviar um comentário