Fretilin: PLP eziji prezidénsia parlamentar hodi substitui koligasaun iha Governu timoroan

Sekretáriu-jeral adjuntu Fretilin nian, partidu ne'ebé hetan liu votu, hatete iha loron-kuarta ne'e katak PLP, forsa polítika datoluk, eziji atu líder hosi nia bankada, Fidelis Magalhães, sai hanesan prezidente Parlamentu Nasional hodi la inklui iha koligasaun governu nian.

Tuir esplika hosi José Reis, Fretilin hatete ona katak partidu aseita de'it senáriu ne'e bainhira kargu ne'e okupa hosi prezidente Partidu Libertasaun Popular (PLP), Taur Matan Ruak, tanba konsulta ida ba deputadu sira hatudu katak hanesan "laiha posibilidade" atu Fidelis Magalhães nia kandidatura - iha estreia iha parlamentu - bele hetan susesu.

Vigor hosi negosiasaun sira hahú tama fali iha debate polítiku iha Timor-Leste hafoin opozisaun maioritáriu iha Parlamentu hatete katak bele la aprova, iha semana oinmai, Programa Governu nian, ne'ebé bele halo monu ezekutivu ne'ebé lidera hosi Fretilin.

Koligasaun Governu nian bele hasoru mós dezafiu ida ba prezidénsia hosi meza parlamentu nasional nian, ne'ebé kaer hosi Aniceto Guterres, ne'ebé bele substitui hosi deputadu ida hosi CNRT ka PLP.

Dirijente Fretilin nian fó hanoin hikas kronolojia hosi negosiasaun ne'ebé Fretilin halo ho partidu haat sira seluk ne'ebé hetan fatin iha parlamentu, hafoin eleisaun sira no kumpri ona "kompromisu katak ho maioria ka la'e" iha Governu ida inkluzaun nian.

Reuniaun dahuluk sira ho Congresso Nacional da Reconstrução Timorense (CNRT), Partidu Libertasaun Popular (PLP), Partidu Demokrátiku (PD) no ho Kmanek Haburas Unidade Nacional Timor Oan (KHUNTO) hala'o entre loron 09 no 12 Agostu.

Iha loron 18 Agostu hala'o reuniaun tékniku detalladu ho PLP "hodi analiza dokumentu baze koligasaun nian, ho prinsípiu sira koligasaun nian" no, tuir José Reis, partidu Taur Matan Ruak nian konsidera katak Fretilin halo hela "deklarasaun mistu sira" kona-ba modalidade Governu nian: koligasaun, inkluzaun ka insidénsia.

José Reis garanti katak iha reuniaun ne'e, líder hosi delegasaun PLP nian, Fidelis Magalhães, hatete ona katak bainhira Fretilin okupa kargu primeiru-ministru nian, nia rasik tenki sai hanesan prezidente Parlamentu nian.

"Fretilin analiza ona asuntu ne'e no determina ona katak bainhira irmaun Taur Matan Ruak avansa hanesan prezidente Parlamentu Nasional nian entaun iha apoiu total hosi Fretilin. Lahó limitasaun. Ami koñese Taur Matan Ruak no ami laiha dúvida ida kona-ba nia lideransa hosi meza parlamentu nian", afirma hosi José Reis.

Mari Alkatiri vizita ona Taur Matan Ruak iha uma hodi fó hatene katak líder PLP nian sei la tama iha Governu no mós iha Parlamentu Nasional tanba "konsulta klean ida ba deputadu sira" hatudu katak "bainhira avansa ho kandidatura hosi Fidelis Magalhães nian, sei la hetan aprovasaun iha votasaun".

"Sekretáriu-jeral informa ona Taur Matan Ruak katak bainhira avansa ho Fidelis entaun sei la hetan aprovasaun. Hanesan risku boot ida. Kestaun hosi meza parlamentu nian entaun sai hanesan kestaun dominante, laiha buat seluk. Fidelis mantén nia pozisaun firmi katak atu sai hanesan prezidente parlamentu nasional nian", nia afirma.

Kona-ba interupsaun seluk iha negosiasaun sira, ho Kmanek Haburas Unidade Nacional Timor Oan (KHUNTO), José Reis hatete katak partidu "aprezenta ezijénsia barak, muda beibeik sira nia argumentu".

Nia hatete katak KHUNTO eziji, liuliu, aumenta fatin ne'ebé maka koresponde ho sira nia fatin, ho ekivalénsia, iha koligasaun.

Solusaun ikusmai maka hanesan Governu minoritáriu ida ne'ebé apoia hosi Fretilin no PD, ne'ebé entre sira hetan fatin 30 entre fatin 65 iha Parlamentu Nasional.

Konferénsia imprensa hosi Fretilin konvoka liutiha oras balun hafoin Taur Matan Ruak, prezidente hosi Partidu Libertasaun Popular (PLP) fó sala ba partidu ne'ebé hetan liu votu tanba interupsaun iha negosiasaun sira hodi harii koligasaun ida Governu nian.

Matan Ruak destaka ona hanesan diferensa boot ida ba falta klareza kona-ba modalidade governasaun nian no konsentrasaun maka'as hosi kbiit sira, liuliu Prezidente Repúblika ida, primeiru-ministru ida no prezidente Parlamentu Nasional ida hotu hosi Fretilin nian.

SAPO TL ho Lusa