quinta-feira, 30 de novembro de 2017

Veteranu Sira Hakarak Hakotu Krize Polítika

DILI: Liu husi selebrasaun loron Restaurasaun Independénsia, veteranu sira husu ba lider antigu no jerente partidu polítiku hanesan Xanana Gusmão, Taur Matan Ruak no Mari Alkatiri atu buka solusaun hakotu krize polítika ne’ebé la’o daudaun iha rai laran.

Maski nune’e, desizaun ikus liu iha Prezidente Repúblika, Francisco Guterres ‘Lú-Olo’ nia liman. Nia hatene ona dalan saida mak nia atu foti hodi solusiona problema ne’e.

Veteranu no Antigu Kombatente, Jorge Alves ‘Wee-Moris’ hatete, veteranu sira firme nafatin iha ninia pozisaun hodi lakohi atu inklina ba grupu ka bloku ruma. Sei hamriik iha klaran hodi fó hanoin atu solusiona krize polítika iha rai laran.

“Husu ba Prezidente Repúblika atu foti desizaun tenke kumpre Konstituisaun”, dehan nia, iha serimónia hasa’e bandeira, iha munisípiu Dili, horisehik.


Nia hatutan, lideransa sira tenke iha vontade polítika hodi rezolve lalais krize polítika ne’e, atu labele rai todan ba jerasaun foun sira. Tuir Jorge, lider sira diverjénsia polítika ne’e normál, maibé atu luta ba povu nia moris di'ak tenke sai lian ida hodi harii unidade nasionál hadi'a povu nia moris.

Nia mós husu ba povu hotu iha territóriu laran tomak atu la bele monu ba situasaun polítika ne’e hodi halo barullu, maibé krize polítika ne’e entrega ba lider sira atu buka malu hodi rezolve.

Nune’e, Veteranu no Antigu Kombatente, Pedro de Oliveira ‘Raka’, hakarak bolu atensaun ba partidu polítiku no lideransa sira atu hatudu nafatin espíritu luta hodi liberta povu husi kiak no mukit.

Nia hatutan, atu liberta povu ne’e, lideransa sira presiza iha konxiénsia polítika hodi haree modelu polítika ne'ebé di'ak atu bele kontribui ba dezenvolvimentu nasionál.

Husu mós ba sidadaun hotu-hotu ne'ebé iha baze atu hakmatek hodi fó oportunidade ba lideransa sira atu termina distinu nasaun ne’e nian.

Independente

Sem comentários: