CLN Hahú Asegura Foos Menus iha Merkadu

DILI, (TATOLI) – Sentru Lojístika Nasionál (CLN-sigla iha portugés), Ministériu Komérsiu no Indústria (MKI) halo ona kontratu ho kompañia Lisun hodi importa foos tonelada 1800 resin ne’ebé sosa husi kompañia Hoang Minh Nhat husi Vietname hodi asegura situasaun karik akontese menus nesesidade báziku liuliu foos.

Diretór Finansa CLN, Leonel da Cruz, hatete antes atu halo importasaun foos, parte CLN halo uluk kontrolu kualidade ba foos  ka halo random check ne’ebé halo ba dahuluk nian katak foos importadu ne’e iha duni nia kualidade ka la’e.

“Tanba membru parlamentu bá iha armazein, membru Governu mós kestiona kualidade foos. Ami tanba ladún satisfás ho ida ne’e entaun ami diretamente bá Vietname atu hatene oinsá foos ne’e bele asegura kualidade bainhira to’o iha Timór”, katak Leonel iha Bebora, ohin.

Hodi hatutan: “aban-bainrua halo intervensaun karik povu labele halerik foos ne’ebé sira sosa ne’e ho kualidade ladi’ak no afeta ba sira-nia saúde, ida ne’e mak ami lakohi akontese iha futuru”.

Leonel hatutan CLN prontu iha kualkér tempu karik akontese mudansa presu ka flutuasaun ba folin sasán liuliu foos CLN prontu atu halo intervensaun.

Kontratu ne’ebé CLN halo ho Lisun ne’e, atu fasilita prosesu importasaun foos ho ró husi empreza foos Vietname nian diretamente mai Timor-Leste. Kontratu ne’e hala’o iha dezembru no daudaun prosesu koordenasaun la’o hela no semana rua tan foos tama ona no bele asegura situasaun menus nesesidade báziku liuliu foos nomós parte ida bele asegura iha fulan-janeiru no fevereiru.

Antes ne’e CLN iha ona planu hodi tau orsamentu U$900 mil resin iha tinan 2017 ba sosa produtu lokál hanesan hare-kulit.

“Foin daudaun iha Lospalos foos folin sa’e, papél CLN atu intervein ida ne’e, sé karik kompañia halo manipulasaun ruma, CLN iha obrigatóriu atu haree oinsá mak presu ne’e normál filafali, ida ne’e mak CLN halo”.

Leonel afirma polítika Governu liuhusi CLN mak oinsá atubele redús importasaun no promove agrikultór sira liuhusi sosa produtu lokál hare-kulit.

“Ita labele dependente ba sosa nesesidade báziku iha rai-liur tanba ne’e ami iha Sestu Governu prioridade sosa hare-kulit de’it, maibé to’o iha Sétimu Governu iha polítika diferente sosa mós produtu seluk. Loloos ne’e ita labele halo importasaun foos, karik ita-nia produsaun foos rai-laran ne’e bele ona nesesita ita-nia nesesidade loroloron”.

Maibé Importasaun foos ne’e halo tanba foos lokál seidauk sufisiente atu responde nesesidade populasaun iha territóriu Timor-Leste nian, nune’e dalan ida mak importasaun hodi asegura no subtitui ai-han.

Jornalista: Maria Auxiliadora | Editora: Rita Almeida

Foto Espesial