DILI, (TATOLI) – Joven
timoan ne’ebé trata dokumentu iha embaixada Portugal iha Dili ho hanoin atu
servisu iha nasaun Europea husu ba governu liuhosi Ministériu Negósiu
Estranjeiru no Koperasaun (MNEK) atu kopera governu Inglatera ou Uniaun
Eropea atu fasilita joven sira ne’e.
“MNEK presiza kria kooperasaun
bilaterál entre Inglatera no Uniaun Europea atu fasilita ami ho di’ak, tanba
dadaun ne’e Embaixada Portugal sira koko atu taka dalan mai ami no manipula
sistema tratamentu dokumentu”, katak Laurentino Tavares ba jornalista sira iha
embaixada Portugal iha Dili, ohin.
Nu’udar portavós preokupa tebes
atendimentu iha embaixada Portugal iha Dili. “Ohin ha’u koko hodi uza forsa
tama ba embaixada laran, Adidu Defeza ho naran Delfim Dores autoriza ha’u tama,
hatudu ha’u nia dokumentu dehan dokumentu mai ona maibé sala, depois ha’u
hatan, durante ne’e ha’u check bebeik maibé ita boot sira tau iha
ne’ebé no check oinsá mak dokumentu hirak ne’e labele hetan, sé
kuandu iha falla ruma informa mai ami hodi hadi’a lais, la’os atu bou (habutul)
iha embaixada laran kundu husu dehan lahatene”, haktuir.
Laurentino hatutan joven timoroan
barak loos trata dokumentu, balun tinan lima, haat, tolu, rua maibé narativa no
bilete identidade nunka mosu mai. “Ohin ha’u konfirma iha sesaun konsuladu
maibé hatan dokumentu tarde tanba asinatura mak la iha no barak liu no la iha
kompeténsia atu atende lais”.
“Pois ha’u husu nune’e, sé kuandu
ita boot la iha kompeténsia atu atende lalais tanba saida abandona ami tinan
tolu, haat eh lima ita boot sira seidauk rezolve depois simu foun nafatin”,
hatutan tan. “Ami mai check fulan-fulan, sira informa mai dehan seidauk, ami
husu tanba saida mak seidauk, sira hatan lahatene”.
Enkuantu, dokumentu hotu trata
liuhosi igreja no legaliza hosi Ministériu Justisa maibé sira dehan illegál
nafatin, entaun hatudu dalan legál ne’e oinsá.
Nu’udar joven timoroan husu ba
pesoál sira ne’ebé servisu iha embaixada Portugal atu servisu ho profesionál
katak dokumentu hirak ne’ebé hetan ona resposta hosi Portugal signifika atu
hetan narativa no bilete identidade, se karik iha fallansu ruma informa atu
hadi’a sedu, la’os hasubar fali dokumentu tinan ba tinan hafoin obriga uza
forsa mak sira foin hatudu.
Hatan ba preokupasaun hirak ne’e,
enkaregadu Sesaun Konsulár, Paulo Maia Silva, dehan ohin embaixada Portugal iha
Dili labele fó sai deklarasaun hodi hatan ba joven timoroan nia ezijénsia maibé
aban loraik (15/01) fó sai ba públiku liuhosi órgaun komunikasaun sosiál.
Jornalista: Zezito Silva | Editora:
Rita Almeida
Imajen: Joven Timoroan iha
Embaixada Portugal nia oin hodi husu klarifikasaun hosi Embaixada kona-ba
dokumentu Narativa no Bilete Identidade ne'ebé tarde liu ona. Foto Zezito
Sem comentários:
Enviar um comentário