quarta-feira, 20 de junho de 2018

Konvida Troka Somocho, Filomeno Paixão Aprezenta Karta Rezignasaun Ba PR


DILI, (TATOLI) - Brigadeiru Jenerál, Filomeno Paixão, aprezenta karta rezignasaun ba Prezidente Repúblika (PR) nu’udar Komandante Supremu FALINTIL-Forsa Defeza Timor-Leste (F-FDTL), Francisco Guterres Lú Olo, liuhusi Majór Jenerál, Lere Anan Timur.

“Horisehik kedas Brigadeiru Filomeno hato’o karta rezignasaun ba ha’u no ohin ha’u lori ninia karta ne’e hodi fó koñesimentu ba Prezidente Repúblika,” Lere hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, kuarta ne’e, hafoin soru-mutu ho Prezidente Repúblika, Francisco Guterres Lú Olo.

Nia haktuir Brigadeiru Filomeno rezigna hosi ninia kargu tanba hetan konvite asume kna’ar foun nu’udar Ministru Defeza iha Oitavu Governu, hodi troka ministru tuan José Agostinho Sequeira Somocho.

“Ha’u simu Primeiru-Ministru Indijitadu, Taur Matan Ruak nia karta kona-ba ami nia dispozisaun, tan ne’e, ami aseita Brigadeiru Filomeno ba Ministru Defeza,” nia haktuir.

Lere informa katak Paixão ba Ministru Defeza fó pasu pozitivu ba instituisaun F-FDTL tanba sei rezolve defikuldade sira ne’ebé durante ne’e instituisaun refere enfrenta maka laiha Konseitu Estratéjiku Defeza no Seguransa, Planu Estratéjiku Militár, Programasaun Militár, nesesidade bázika Forsa Armada nian, bairru ba militár no tau matan ba kazerna militár iha Hera ne’ebé atu monu.

“Planu ne’e ami aprezenta ona ba ministru defeza sira uluk liu-ba maibé la implementa. Agora, nia (Brigadeiru Paixão) atu ba implementa ida ne’e,” nia esklarese.

Tuir nia katak ho prezensa Brigadeiru Paixão nu’udar Ministru Defeza bele lori instituisaun F-FDTL ba moris di’ak tanba brigadeiru refere konese di’ak situasaun ne’ebé Forsa Armada enfrenta.

Lere esplika katak ofisiál ne’ebé atu troka Brigadeiru Filomeno ne’e entre brigadeiru jenerál ne’ebé foin lalais simu ona pose, maibé seidauk bele fó sai naran tanba nia seidauk halo proposta ba Prezidente Repúblika atu nomea.

Jornalista: Xisto Freitas | Editór: Manuel Pinto

Imajen: Brigadeiru Jenerál FALINTIL-Forsa Defeza Timor-Leste (F-FDTL), Filomeno Paixão. Imajen mídia Palásiu PR.

Sem comentários: