quarta-feira, 20 de junho de 2018

PM Indijitadu Submete Lista Membru Governu Ba PR | Koñese PM Foun


DILI, (TATOLI) - Primeiru-Ministru Indijitadu Oitavu Governu, Taur Matan Ruak, entrega lista membru Governu ba Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, Kuarta ne’e.

Maski nune’e, Primeiru Ministru oitavu governu ne’e la fó sai lista ne’e ba públiku, tanba Xefe Estadu mak iha kompeténsia atu anunsia.

“Buat hotu Prezidente Repúblika maka bele fó sai inklui loron tomada pose. Loron hira tan ita-boot (jornalista-red) sira bele simu ona infomasaun klaru,” Taur Matan Ruak esplika ba jornalista sira hafoin hasoru Prezidente Repúblika.

Enkuantu bazeia ba komunikadu imprensa ne’ebé maka Mídia Prezidénsia Repúblika fó sai iha Tersa horisehik, Prezidente Repúblika sei uza nia kompeténsia hodi defende integridade Governu, liu-liu Estadu tanba ne’e presiza haree didi’ak fali lista membru VIII Governu Konstitusionál molok fó nomeasaun.

Koñese Primeiru Ministru Foun

Taur Matan Ruak, moris iha loron 10 Outubru 1956, iha Osso Huna, Baguia, distritu Baucau, Timor-Leste. Taur Matan Ruak, oan husi António de Vasconcelos no Albertina Amaral, moris besik subdistritu Baguia, distritu Baucau. Nia mak oan dahuluk husi mane na’in-3 no feto na’in-5. Iha 1960 nia muda mai iha Dili hamutuk ho ninia tiun. Iha 1963 nia tama eskola primária no ramata ninia estudu iha 1968.

Iha 7 Dezembru, 1975, Indonézia invade Timor-Leste. Iha momentu ne’ebá, Taur Matan Ruak ho tinan 19 tama FALINTIL – FRETILIN nia liman kro’at ne’ebé foin kria. Durante tinan tolu tuirmai, povu timoroan selu folin aas ne’ebé rezulta ema 100.000 mate.

Nu’udar kombatente, nia partisipa iha luta hasoru militár Indonézia nian iha Dili, Aileu, Maubisi, Ossu, Venilale, Uatulari no ikus liu iha Laga, iha ne’ebá to’o ikus nia hela ba.

Taur Matan Ruak hahú hetan fiar hodi simu knar iha FALINTIL nu’udar komandu iha 1976. Durante faze ida-ne’e, FRETILIN afirma katak kontrola 80% territóriu.

Husi 1967 to’o 1979, Taur Matan Ruak tuur iha estrutura FALINTIL laran iha setór militár rua parte leste nian: Setór Sentru Leste no Setór Ponta Leste. Hafoin nia sai Komandante Kompañia ida. Iha 1977 nia rohan, militár Indonézia hahú Operasaun ba Serku no Anikilamentu ne’ebé halo forsa rezisténsia mate barak. Iha tinan tuirmai, forsa Indonézia sira konsege halakon 80% husi forsa Rezisténsia, hamutuk ho sira-nia baze apoiu.

Iha 22 Novembru, 1978, baze Rezisténsia ikus nian rahun tiha. Kay Rala Xanana Gusmão, Taur Matan Ruak no membru Rezisténsia sira seluk hasoru malu fali iha loron tuirmai iha foho Legumau hodi kontinua operasaun gerrilla.

Komandante-em-Xefe FALINTIL nian, Nicolau Lobato, mate iha 31 Dezembru 1978, hamutuk ho ninia maluk sira, ne’e hanesan lideransa fundadora Rezisténsia nia rohan.

Hahú 1979 – 1980, enkuantu maioria forsas Rezisténsia nian muda ba rejiaun rai-klaran hodi organiza filafali no hametin Rezisténsia ho lideransa Xanana Gusmão nu’udar Komandante-em-Xefe, Taur Matan Ruak hetan orden atu halo asaun gerrilla iha rejiaun leste.

Iha 31 Marsu 1979, Taur Matan Ruak hetan kapturasaun husi militár ABRI iha área Viqueque bainhira nia hala’o nia misaun hodi buka tuir sira-ne’ebé salva an husi Operasaun Serku no Anikilamentu. Nia konsege halai hafoin loron 23 no hetan fali FALINTIL iha foho.

Iha Marsu 1981 nia sai Kolaboradór ba Xefe Estadu-Maiór FALINTIL no komandante operasionál ne’ebé responsabiliza iha setór leste no, ikus mai, iha setór oeste.

Iha Marsu 1983, Rezisténsia no reprezentante sira militár Indonézia nian deside halo akordu dame, maibé iha Agostu 1983, militár Indonézia halo masakre iha Kraras, ne’ebé akordu dame la hetan solusaun. Iha fulan Setembru deklara estadu emerjénsia no militár Indonézia hahú operasaun foun ida – Operasaun Dasa.

Nafatin iha 1983, Taur Matan Ruak transfere ba Komandu Operasionál Oeste (rejiaun oeste tomak, área Baucau/Viqueque) no sai konselleiru militár no sub-xefe ba Estadu-Maiór FALINTIL nian.

Hahú husi 1986, Taur Matan Ruak kaer responsabilidade ba operasaun militár hotu-hotu iha Timor-Leste.

Iha Novembru 1992, Komandante-em-Xefe Xanana Gusmão kapturadu iha Dili. Taur Matan Ruak hetan promosaun ba Xefe Estadu-Maiór, enkuantu Xanana Gusmão kaer nafatin knaar Komandante-em-Xefe FALINTIL nian maski iha prizaun Jakarta hela.

Taur Matan Ruak sai Vise-Komandante-em-Xefe FALINTIL tomak hafoin Komandante Konis Santana mate iha 11 Marsu, 1998.

Iha Jullu 1999, FALINTIL nia akantonamentu haat de’it. Taur Matan Ruak mak responsabiliza atu evita gerrilleiru FALINTIL tiru hasoru forsa Indonézia no pró-indonézia.
Iha 30 Agostu 1999, Nasoins Unidas hala’o referendu ida iha Timor-Leste no maioria hili ba ukun rasik an.

Tuir kedas referendu ne’e, militár Indonézia sira halo violénsia maka’as ne’ebé konsege para husi Forsa Internasionál ne’ebé hetan aprovasaun husi ONU hodi tama mai Timór. Períodu ida-ne’e sai hanesan teste ba FALINTIL nia dixiplina tanba obriga sira nonook hela enkuantu populasaun husu protesaun hasoru violénsia forsa Indonézia sira nian.

Iha 10 Dezembru, Asembleia Repúblika Portugal fó Prémiu Direitus Umanus ba Taur Matan Ruak iha Lizboa.

Iha 20 Agostu, 2000, Kay Rala Xanana Gusmão rezigna hosi FALINTIL no Taur Matan Ruak simu kargu nu’udar Komandante-em-Xefe FALINTIL nian.

Iha 1 Fevereiru, 2001, Taur Matan Ruak asume Komandu FDTL nian, Forsa Defeza Timor-Leste, ho patente Brigadeiru-Jenerál durante serimónia ida ne’ebé prezide husi saudozu Dr. Sérgio Vieira de Melo, Administradór Tranzitóriu ONU nian.

Ho Restaurasaun Independénsia iha 20 Maiu, 2002, Taur Matan Ruak sai nu’udar Xefe Estadu-Maiór Jenerál ba F-FDTL, FALINTIL – Forsas Defeza Timor-Leste.

Iha 7 Dezembru 2006 Prezidente Ramos-Horta kondekora Taur Matan Ruak ho Orden da Guerrilla.

Iha 2007 Prezidente Ramos-Horta kondekora tan Taur Matan Ruak ba servisus prestadus durante Operasaun Halibur, operasaun ne’ebé F-FDTL hala’o hamutuk ho PNTL hodi estabelese fali seguransa no orden iha ita rain hafoin konflitu polítiku 2006 nian.

Iha 28 Novembru, 2009, Prezidente Ramos-Horta promove Taur Matan Ruak ba Majór-Jenerál.

Iha Serimónia Omenajen Nasionál Agradesimentu no Rekoñesementu ba eis-kombatentes ba luta libertasaun nian iha 20 Agostu, 2011, Taur Matan Ruak dezmobilizadu hosi FALINTIL no kondekoradu hamutuk ho eis-kombatentes 235 seluk.

Depois nia hatama pedidu ba ezonerasaun hosi ninia kargu, iha 6 Outubru, 2011 Taur Matan Ruak hato’o ninia diskursu ba dahikus nu’udar Xefe Estadu-Maiór Jenerál F-FDTL nian durante serimónia pasajen testemuñu komandu Forsa Defeza sira.

Iha 23 Abríl, 2012, Tribunál Rekursu Timor-Leste nian proklama Taur Matan Ruak nu’udar Prezidente Eleitu, hafoin manan liu-husi eleisaun demokrátika iha loron 16 Abríl 2012.

Taur Matan Ruak simu posse nu’udar Prezidente Repúblika  ba períodu 2012-2017 iha 20 Maiu, 2012. Prezidente Taur Matan Ruak kaben ho Dr.ª Isabel da Costa Ferreira, jurista ida ne’ebé serbisu iha área direitus umanus hamutuk ho Primeiru-Ministru husi I Governu Konstitusionál, nia mós Vise-Ministra Justisa no membru CVA. Oras-ne’e, nia kaer nafatin serbisu nu’udar Asesora ba Sekretáriu Estadu Seguransa no Komisária ba Komisaun Funsaun Públika. Sira iha oan-feto rua, Lola no Tamarisa, no oan-mane ida, Quesadhip.

Taur Matan Ruak hanesan Primeiru Ministru ba períodu 2018-2023 bele  ko’alia lian tolu Timor-Leste nian (Tétum, Noeti, Makassae), lia-portugés no lia-inglés.

Jornalista: Xisto Freitas | Editór: Manuel Pinto

Imajen: Taur Matan Ruak, Primeiru Ministru Oitavu Governu

Sem comentários: