quarta-feira, 20 de junho de 2018

Prezidénsia: Governu konstitusional timoroan daualuk simu pose iha loron-sesta


Prezidénsia Repúblika timoroan konfirma ona, iha loron-tersa ne'e, katak Governu konstitusional daualuk sei simu pose iha serimónia ida iha Palásiu Lahane, Díli, iha loron-sesta ne'e, maibé la avansa detalle ruma kona-ba kompozisaun hosi ezekutivu foun.

Iha komunikadu ne'ebé fó sai iha loraik, oras lokal, Francisco Guterres Lu-Olo nia gabinete esplika katak xefe Estadu hasoru malu ona ho reprezentante sira hosi partidu ho koligasaun partidáriu sira ne'ebé iha fatin iha parlamentu "hodi haree ba eskolla primeiru-ministru nian".

Previzaun maka Lu-Olo asina iha loron-kuarta dekretu hosi nomeasaun xefe Governu foun, ne'ebé, tuir fonte partidáriu sira ne'ebé ko'alia ba Lusa, maka Taur Matan Ruak.

Gabinete esplika katak iha semana liubá Aliansa Mudansa ba Progresu (AMP) - koligasaun ne'ebé manán eleisaun lejislativu loron 12 Maiu ho maioria absoluta - "entrega ona karta ida ba Prezidente Repúblika kona-ba desizaun eskolla primeiru-ministru nian".

Fonte hosi AMP konfirma ona ba Lusa katak karta ne'e, entrega iha loron-kinta, hili ona eis-Prezidente Taur Matan Ruak, númeru daruak AMP nian, nu'udar primeiru-ministru.

"Tuir mandatu konstitusional, Prezidente Repúblika hafoin rona tiha partidu polítiku sira sei asina dekretu prezidensial ida hosi nomeasaun ba primeiru-ministru ba Governu konstitusional daualuk", esplika hosi komunikadu loron-tersa nian.

Komunikadu ne'e fó sai hafoin xefe Estadu hasoru malu ho delegasaun hosi AMP, Frente Revolucionária do Timor-Leste Independente (Fretilin), Partidu Demokrátiku (PD) no hosi koligasaun Frente Dezenvolvimentu Demokrátiku (FDD).

Iha enkontru loron-tersa nian, prezidente AMP, Xanana Gusmão, konfirma ona konteúdu hosi karta ne'ebé haruka iha semana liubá ba Prezidente Repúblika, refere iha komunikadu.

Partidu sira seluk "la hatudu protestu ruma ba eskolla hosi primeiru-ministru nian, apoia desizaun hosi Prezidente Repúblika" hodi fó pose ba xefe Governu foun.

"Fretilin ho PD mantén desizaun hosi partidu sira hodi sai hanesan opozisaun. FDD informa ona ba Prezidente katak haruka ona ba Tribunal Rekursu karta ida hodi sobu koligasaun", refere mós nota ne'ebé divulga iha loron-tersa ne'e.

SAPO TL ho Lusa

Sem comentários: