quarta-feira, 25 de julho de 2018

Governu Hakarak Promove Governasaun Di’ak No Kombate Korrupsaun

PARTILHAR

DILI, (TATOLI) – Primeiru-Ministru (PM), Taur Matan Ruak hateten, governasaun di’ak no kombate korrupsaun maka kondisaun esensiál hirak ne’ebé atu fó servisu no atu implementa polítika no asaun sira ne’ebé fó sai  iha opsaun boot sira iha planu no programa Governu nian.

“Ita hakarak aumenta konfiansa iha governasaun ne’e, liuhusi mekanizmu sira ne’ebé di’ak liu atu halo avaliasaun ba rezultadu no dezempeñu”, tenik iha aprezentasaun programa iha plenária ohin.

Atu alkansa buat hirak ne’e, Xefe Governu dehan, tenke promove komunikasaun ida ne’ebé boot liután, kolaborasaun ne’ebé boot liután ho grupu sidadaun no organizasaun sosiedade sivíl nian sira no transparénsia ida ne’ebé boot liután iha ezekusaun orsamentál, liuliu iha projetu ho dimensaun boot sira.

Aleinde ida ne’e, governu ne’ebé nia lidera sei rigorozu ba administrasaun públika nian ne’ebé hetan benefísiu.

“Ita sei rigorozu la’ós de’it ho ita-nia an rasik, ho membru Governu no responsavel sira administrasaun públika nian, maibé mós ho sira ne’ebé direta ka indiretamente hetan benefísiu husi rekursu sira no subvensaun sira husi Estadu, ka sira ne’ebé utiliza sasán no ekipamentu sira ne’ebé serbisu públiku fasilita hanesan eletrisidade, bee, transporte, komunikasaun sira, no seluk-seluk tan hodi promove utilizasaun, manutensaun ka konservasaun ne’ebé di’ak, hodi evita gastu hirak ne’ebé maka’as liu, gastu hirak ne’ebé la presiza ka estragu sira ba propriedade públika”, Taur Matan Ruak afirma.

Jornalista: Julia Chatarina | Editór: Manuel Pinto

Imajen: Primeiru-Ministru (PM), Taur Matan Ruak
PARTILHAR

Author: verified_user

Publicação luso-timorense sem fins lucrativos

0 comentários: