Entrada previzível ba observador
asosiadu sira ba Komunidade hosi Nasaun sira Lian Portugeza nian (CPLP), iha
simeira tuirmai, hanesan "sinal kredibilidade ho vizibilidade" hosi
organizasaun, ne'ebé agora tenki reflete kona-ba oinsá aproveita parseria sira
ne'e, defende hosi sekretária-ezekutivu.
Iha ajenda hosi konferénsia ba
dala 11 hosi xefe Estadu no Governu sira CPLP nian, ne'ebé hala'o iha
loron-tersa ho loron-kuarta iha Santa Maria, illa Sal, Cabo Verde, iha proposta
hodi fó estatutu observador asosiadu ba nasaun ualu - Reinu Unidu, Fransa, Itália,
Andorra, Luxemburgu, Sérvia, Arjentina ho Xile – no, ba dala uluk, organizasaun
ida - Organizasaun hosi Estadu Ibero-Amerikanu sira ba Edukasaun, Siénsia no
Kultura (OEI).
"Hanesan sinal kredibilidade
no vizibilidade ne'ebé maka CPLP hetan iha tempu ikus ne'e iha área
internasional", hatete hosi sekretária-ezekutiva hosi organizasaun, Maria
do Carmo Silveira, iha entrevista ba Lusa.
Ba responsável, "ne'e hatudu
katak CPLP hetan vizibilizasaun hanesan fórum ida hosi konsertasaun
polítiku-diplomátika importante, iha nafatin atuasaun iha área internasional ho
susesu balun, hodi permiti atu hatudu atratividade ne'ebé boot oituan".
Nune'e, nia hatutan ona,
"nasaun sira haree iha CPLP oportunidade ida hodi reforsa sira nia
parseria ho relasaun koperasaun nian".
Ho entrada hosi nasaun ualu ho
hosi OEI, komunidade luzófonu sei hetan observador asosiadu hamutuk 19, liu
dobru hosi membru sira ne'ebé maka halo parte loloos.
Tuir sekretária-ezekutivu, ne'e
reprezenta hanesan "dezafiu boot" hosi "hasoru ho aumentu hosi
númeru asosiadu sira no oinsá bele hetan proveitu di'ak hosi relasaun ne'ebé
maka parseria ne'e estabelese".
"Tanba motivu ne'e, ita hahú
ona reflesaun sira iha nível sekretariadu nian no ita sei kontinua hametin
liután, tanba hanesan nasaun sira ho nível dezenvolvimentu ne'ebé la hanesan no
ho potensialidade sira ne'ebé la hanesan", nia konsidera.
Tuir Maria do Carmo Silveira,
CPLP "aumenta nune'e posibilidade hosi konsertasaun polítika-diplomátiku,
maibé mós iha nível hosi koperasaun ekonómiku no mós koperasaun iha área
tomak".
Responsável rekorda mós katak,
tuir nia estatutu sira, CPLP "iha disponibilidade hodi kopera ho
observador asosiadu sira iha área oioin: iha edukasaun, kultura, iha formasaun
ema sira nian, iha koperasaun ekonómiku no emprezarial, iha
investigasaun".
Hatán kona-ba karik observador
asosiadu balun bele iha ambisaun hodi sai hanesan membru loloos - hanesan
akontese, iha pasadu, ho Guiné Ekuatorial -, Maria do Carmo Silveira, afirma
ona katak CPLP "nunka simu tuir dalan formal manifestasaun hosi interese
ne'e" no admiti ona katak ne'e hanesan ideia ida ne'ebé ladún provável.
"Fator ne'ebé halibur
nasaun-membru sira hosi plenu direitu CPLP maka lian portugeza. Nasaun
observador sira, no tanba la'ós nasaun ho lian ofisial portugeza, ha'u haree
susar ruma iha futuru ba nia adezaun iah CPLP", nia refere.
Iha Guiné Ekuatorial, ne'ebé adere
ba organizasaun iha tinan 2014, lian portugeza mós la'ós hanesan lian ne'ebé
uza hodi ko'alia, maibé autoridade ekuato-guiniense sira hatama ona hanesan
lian ofisial datoluk, hamutuk ho españól ho fransés, iha momentu adezaun ba
CPLP.
Ba Maria do Carmo Silveira,
"iha aspetu istóriku sira ne'ebé favorese ba Guiné Ekuatorial",
nasaun ida ne'ebé ema portugés sira deskobre iha tinan 1470, maibé hafoin ne'e
okupa hosi ema españól sira iha tinan 1778, to'o hetan independénsia iha tinan
1968.
Agora daudaun, observador
asosiadu sira hosi CPLP maka Hungria, Repúblika Xeka, Eslovákia, Uruguai, illa
Maurísia, Namíbia, Senegal, Turkia, Japaun ho Jeórjia.
Kosta-Marfim ho Peru mós hatudu
ona intensaun hodi husu estatutu ba organizasaun luzófonu, maibé prosesu sira
seidauk hotu antes reuniaun.
Estatutu hosi observador asosiadu
harii iha tinan 2005 no bele aplika ba Estadu sira no rejiaun luzófonu sira
ne'ebé pertense ba nasaun datoluk sira.
CPLP defini katak Estadu sira
ne'ebé simu estatutu ne'e tenki fahe "prinsípiu orientador sira" hosi
organizasaun, liuliu kona-ba "promosaun hosi asaun demokrátiku sira,
governasaun di'ak no respeitu ba direitu ema nian", no ne'ebé
"kontinua liuhosi programa sir aGovernu nian objetivu sira ne'ebé
hanesan" ho objetivu sira bloku luzófonu nian, "maski, ba dala uluk,
laiha kondisaun nesesáriu sira hodi sai hanesan membru loloos".
Observador asosiadu sira bele
partisipa, lahó direitu votu nian, iha simeira ho Konsellu Ministru sira
(ne'ebé halibur xefe sira diplomasia nian hosi Estadu-membru sira), nune'e mós
iha reuniaun tékniku sira.
Cabo Verde simu, iha loron 17 no
18 Jullu, iha illa Sal, konferénsia ba dala 11 hosi xefe Estadu no Governu CPLP
nian, simeira ne'ebé marka inísiu hosi prezidénsia kabu-verdianu hosi
organizasaun nian, ne'ebé hili ba tema "Kultura, ema sira ho oseanu
sira".
CPLP komposta hosi Angola,
Brazil, Cabo Verde, Guiné-Bissau, Guiné Ekuatorial, Mosambike, Portugal, São
Tomé e& Prínsipe ho Timor-Leste.
SAPO TL ho Lusa
Sem comentários:
Enviar um comentário