terça-feira, 7 de agosto de 2018

Kazu Reazen Tiru PNTL-F-FDTL Iha Ona Prosesu Investigasaun

PARTILHAR

DILI, (TATOLI) – Komandu Jerál Polísia Nasionál Timor-Leste (PNTL), Júlio da Costa Hornai, ohin iha Komandu Jerál PNTL, Kaikoli informa kazu reazen tiru entre oknum PNTL ho FALINTIL-Forsa Defeza Timor-Leste (F-FDTL) iha Maliana, sábadu foin lais ne’e, iha ona prosesu investigasaun.

“Ami nomeia ona investigasaun konjunta hosi parte justisa PNTL ho F-FDTL nian aranka kedas horisehik ba Maliana. Sira to’o ona fatin hodi konvoka enkontru ho administradór munisípiu, Prezidente Autoridade Munisípiu. Sira ohin halo ona servisu investigasaun depois komandu sei foti medida ne’ebé forte ba aktu ida ne’e”, hateten Komandu Jerál PNTL ba jornalista sira.

Tuir nia lei PNTL ho F-FDTL nian kona-ba utilizasaun arma klaru kedan. Katak arma hirak ne’e atu uza ba nesesidade servisu, la’os uza hodi ameasa malu no uza atu ameasa povu. Tanba ne’e komandu mantein nafatin pozisaun hodi foti medida rigorozu ba instituisaun rua ne’e nia ema bainhira komete aktu ruma ne’ebé mak sai hosi regra ka sai hosi misaun instituisaun nian.

Prosesu investigasaun la’o ona, Komandu PNTL ho F-FDTL hein rejultadu investigasaun hosi ekipa konjunta permanente ne’ebé mak monta ona liuhosi despaisu ne’ebé komandu Jerál PNTL ho Xefe Estadu Maiór deside.

“Kuandu akontese kazu ruma entre PNTL ho F-FDTL, ekipa investigadór sira ne’e mak sei tun hodi halo investigasaun kle’an ba aktu hirak ne’e hodi relata mai komandu rua”, katak.

Nia esplika parte F-FDTL nian tenke hato’o relatóriu ba Xefe Estadu Maiór Jenerál no PNTL nian sei relata mai komandante jerál PNTL hodi haree no deside ba prosesu investigasaun disiplinár atu komandu foti disizaun imediatu.

Ekipa invetigadór sira ohin hahú investiga. Evidénsia mak arma ne’ebé sira utiliza no ekipa sei foti medida ba asuntu ne’e. Sira sei retira arma depois submete ba prosesu investigasaun.

“Ha’u seidauk ko’alia kona-ba kronolojia enkuantu ha’u seidauk simu relatóriu maibé importante mak ba povu katak forsa rua toma ona medida hodi haruka investigadór sira hodi atende asuntu ne’e”, afirma.

Jornalista: Zezito Silva | Editora: Rita Almeida

Imajen: Komandante Jerál PNTL, Komisáriu Júlio da Costa Hornai dadalia ho jornalista sira hafoin ramata inkontru ho Xefi Estadu Lú-Olo. Imajen Ajénsia TATOLI/Xisto Freitas
PARTILHAR

Author: verified_user

Publicação luso-timorense sem fins lucrativos

0 comentários: