segunda-feira, 6 de agosto de 2018

Oknum Polísia Ida Dezarmadu Tanba Halo Ameasa Ho Pistola

PARTILHAR

DILI, (TATOLI) – Komandu Jerál Polísia Nasionál Timor-Leste (PNTL), Komisáriu Júlio da Costa Hornay, informa oknum polísia ne’ebé lori pistola hodi ameasa ema iha igreja Bidau Mota Klaran dadaun ne’e dezarmadu hodi submete ba prosesu investigasaun.

“Ohin dadersan nia komandante lori ona mai aprezenta iha ne’e, depois ha’u bolu justisa mai hodi foti kedas nia arma ka dezarma ba prosesu investigasaun”, hateten komisáriu Hornay ba jornalista sira iha Komandu Jerál PNTL, Kaikoli, ohin.

Kazu ne’e akontese horikalan. “Ha’u fó ordem kedan ba komandante munisípiu atu kaer oknum polísia ida ne’e hodi hatama ba sela laran, maibé sira to’o iha ne’ebá oknum polísia ne’e halai depois la konsege kaer”.

“Ohin dader ha’u haruka komandante munisípiu lori nia mai (oknum polísia) depois dezarma hafoin prosesa ba prosesu investigasaun”, tenik.

Nia akresenta: “Ita lalika halimar demais, ita nu’udar nudar autoridade seguransa tenke halo misaun ho klaru, la’os sai servisu depois halo fali ameasa tun sa’e”.

Parte seluk, Deputadu partidu Frente Revolusionária Timor-Leste Independente (FRETILIN), David Dias Ximenes, levanta kestaun ne’e iha parlamentu tanba hahalok ne’e ameasa ema iha igreja laran ne’e la di’ak.

“Deskonfia membru polisia ida halo ameasa pistola iha igreja mota klaran Bidau nian. Ema reja no nia tuir nia namorada ba depois tama to’o igreja hodi lori pistol ameasa ema depois tolok ema iha igreja laran. Ida ne’e hahalok la di’ak no husu investigasaun”, afirma Deputadu.

Jornalista: Zezito Silva | Editora: Rita Almeida

Imajen: Komandante Jerál PNTL, Júlio da Costa Hornai.
PARTILHAR

Author: verified_user

Publicação luso-timorense sem fins lucrativos

0 comentários: