terça-feira, 7 de agosto de 2018

Tan Impasse Ikus Mai CNRT Fó “Warning” Ba PR


DILI, (TATOLI) - Partidu Kongresu Nasionál Rekonstrusaun Timorense (CNRT-Sigla Portugés), fó warning (atensaun) ba Prezidente Repúblika (PR) iha loron sanulu (10) atu fó pose ba kuadru CNRT nian, ne’ebé indijitadu ba membru governu da-8, nu’udar solusaun hakotu impasse politika.

Porta Vóz CNRT, Gabriel Soares, informa Prezidente Repúblika (PR), Francisco Guterres “Lu-Olo” kontinua la fó posse ba kandidatu membru governu hirak ne’ebé pendente mak partidu CNRT sei deklara hodi retira votu konfiansa ba PR.

“Prezidente Repúblika lakohi fó posse nafatin ba kandidatu membru governu mak prezidente nia obrigasaun tuir lei tenke justifika no deklara ho eskrita iha Dekretu Prezidente Repúblika ba públiku hodi bele hatene razaun fundamentu prezidente nian,” Gabriel Soares afirma liuhosi konferénsia imprensa iha Sede CNRT, Bairru Grilos, Ohin.

Nia dehan bainhira PR Francisco Guterres Lú Olo la fó resposta ruma iha tempu mak partidu CNRT sei deklara hodi retira votu konfiansa ba xefe estadu ne’ebé uluk CNRT mós apoiu nia kandidatura.

“Uluk partidu CNRT inklui Prezidente partidu Kay Rala Xanana Gusmão fó apoiu tomak iha eleisaun prezidensiál 2017. Tanba ne’e kuadru militante Partidu CNRT hosi territóriu laran tomak fó tempu loron 10 ba Prezidente atu fó posse ona ba kuadru CNRT ne’ebé indijitadu ba membru Governu Konstitusionál da-8 nian, atu fó solusaun lais ba impase polítika ne’ebé nasaun enfrenta,” Gabriel deklara.

Lori partidu CNRT, hahú hosi estrutura munisípiu sanulu resin rua inklui Rejiaun Autónomu Enklave Oe-Cusse (RAEOA) ezije ba Deputadu Aliansa Maioria Parlamentár atu hato’o “Impeachment” ba Prezidente tuir Konstituisaun Repúblika Demokrátika Timor-Leste (K-RDTL) tanba Xefe Estadu halo ona violasaun grave ba konstituisaun.

Nune’e mós koordenadór estrutura munisipál CNRT nian apela atu Prezidente hala’o mandatu tuir konstituisaun hodi reprezenta Timoroan tomak hodi kontribui ba estabilidade polítika, sosiál no ekonómika ba povu no nasaun.

Entretantu, iha konferénsia imprensa, ohin, Partidu CNRT hato’o mós nia preokupasaun ba impasse polítika ne’ebé halo destruisaun ba situasaun polítika, estabilidade nasionál no situasaun emerjénsia iha Finansa públika Estadu nian tan kandidatu membru governu da-ualu ne’ebé la dauk hetan posse hosi Prezidente.

Jornalista: Zezito Silva | Editór: Manuel Pinto
Imajen: Delegadu kongresu.

Sem comentários: