DILI, (TATOLI) – Ministru
Reforma Lejizlativa no Asuntu Parlamentár, Fidelis Magalhães, informa; Ministru
Estadu Prezidénsia Konsellu, Agio Pereira mak tau matan hotu ba servisu
ministru hirak ne’ebé seidauk hetan pose.
Ho ida ne’e, Fidelis afirma sei
la iha implikasaun ba debate kona Proposta Orsamentu Jerál Estadu iha
jeneralidade no espesialidade.
“Los duni katak restante
kandidatu membru governu hirak ne’e la fó implikasaun ba debate Proposta
Orsamentu Jerál Estadu, mezmu sira seidauk hetan pose, maibé Ministru Estadu Prezidénsia
Konsellu Ministru mak ezerse hotu servisu ne’e,” Fidelis Magalhães ba
jornalista sira iha Parlamentu Nasionál, ohin.
Nia hatutan ministériu balun
ne’ebé iha ona vise-ministru, entaun sira asume interinamente hanesan ministru,
ezemplu mak Ministériu Administrasaun Estatál no Ministériu Finansa.
Mezmu nune’e governu bele la’o,
maibé ideál liu mak tenke solusiona impase polítika atu estrutura governu bele
kompletu ona.
“Ita hotu hein atu solusiona lais
ba restante membru governu ne’ebé daudaun ne’e pendente,” Fidelis espera.
Nia mós husu ba bankada opozisaun
bele halo proposta alterasaun ba proposta OJE 2018, bainhira la konkorda ho
polítika governu nian, hanesan orientasaun prezidente parlamentu nian, iha
inskrisaun ba proposta alterasaun bele tama ohin, konforme orientasaun ba
deputadu sira atu ida-idak bele hatama.
Entretantu, Deputadu Bankada
Kongresu Nasionál Rekonstrusaun Timorese (CNRT-Sigla Portugés), Gabriel de
Jesus apresia tebes ba governu tanba bele aprezenta Proposta OJE 2018 iha
Parlamentu Nasionál atu nune’e bele hakotu siklu orsamentu dua-desimál.
Jornalista: Zezito Silva | Editór:
Manuel Pinto
Sem comentários:
Enviar um comentário