DILI, (TATOLI) - Xefe Estadu
Maior Jenerál FALINTIL-Forsa Defeza Timor-Leste (F-FDTL), Lere Anan Timur,
hateten nia halo ona despaisu ba Repasaun Justisa iha F-FDTL atu loke prosesu
disiplinár ba sira na’in hira ne’ebé konsideradu suspeitu ba akontesementu kazu
Maliana iha 4 agustu liu-ba.
“Loke tiha prosesu disiplinár
maka ita foin haree sira sala ka la sala. Se sala ninia gravidade oinsá depois
ha’u toma ha’u nia kompeténsia fó medida ba sira,” dehan Lere ba
jornalista-sira iha Palásiu Prezidente Nicolau Lobato, Bairru Pité, Dili,
kuarta ne’e, hafoin hala’o enkontru ho Prezidente Repúblika, Francisco Guterres
Lú Olo, kona-ba situasaun seguransa rai laran.
Bainhira ligadu ba krime, Lere
informa, ne’e tribunál maka sei responsabiliza.
Nia haktuir katak membru hirak
ne’ebé sei submete ba prosesu disiplinár ne’e hamutuk ema na’in 12 kompostu
hosi kapitaun na’in ida, tenente ida ho soldadu na’in sanulu no dadaun ne’e
sira na’in 12 ne’ebé antes ne’e detidu iha sela Polísia Militár, fila hikas ona
ba komponente ho dezarmadu tanba sei iha situasaun detidu nafatin, katak,
bainhira iha problema ruma ka defikuldade ruma iha sira nia família, bele ba
uma maibé eskoltadu.
Lere esklarese katak prosesu ne’e
sei lori tempu tanba sira (membru na’in 12) mós iha direitu atu defende
sira-nia án.
Tuir eis Komandante Gerileiru
ne’e katak sira iha konkluzaun katak kazu ne’e akontese tanba oknum forsa rua
ne’e lanu hotu, maibé lei la permiti kualkér militár bele lanu.
Jornalista: Xisto Freitas | Editór:
Manuel Pinto
Sem comentários:
Enviar um comentário