Orsamentu ba tinan 2018, ne'ebé
maka hahú debate iha loron-segunda ne'e iha parlamentu timoroan, hanesan pasu
ida nebé nesesariu hodi rekupera fali normalidade politika no finanseira iha
Timor-Leste, defende primeiru-ministru timoroan.
"Bem komum timoroan sira
nian tenki tau as liu ita nian interese individual sira ka estratejia
partidaria sira. Iha sentidu ida ne'e, OJE (Orsamentu Jeral estadu nian) ba
tinan 2018 ne'ebé mak ohin ami aprezenta, hanesan oportunidade hodi ultrapasa
ami nian diferensa hotu no serbisu hamutuk hodi fo vantajen ba ita nian povu no
ba nasaun timoroan", hatete Taur Matan Ruak.
"Maski iha hanoin no
ideolojia politika ne'ebé la hanesan, eziste konsensu ida ne'ebé tenki sai
prioridade, liuliu: hodi kombate hamlaha, mizéria no nesesidade sira ba buat
hotu, kondisaun moris ne'ebé di'ak, asesu di'ak ba serbisu publiku sira hanesan
edukasaun, saude, infraestrutura bazika sira, hela fatin, seneamentu baziku,
eletrisidade, asesibilidade no transporte", hatete.
Taur Matan Ruak koalia iha aranke
ba debate OJE ne'ebé halao iha loron segunda-feira ne'e iha Parlamentu
Nasional, dokumentu ne'ebé aprezenta ho urjénsia no nesesariu, hatete katak
hodi "rekupera fali normalidade politika no finanseira".
Dokumentu ida ne'ebé hatudu ho
"sensatez no kuidadu orsamental" meibe la prejudika "kompromisu
hodi kontinua serbisu hodi asegura prosperidade no moris di'ak" populasaun
timoroan sira.
Fulan rua hafoin tomada pose
Governu nian, aprovasaun Orsamentu nian permite ultrpasa difikuldade sira
ne'ebé nasaun ne'e sente dezde inisiu tinan ne'e, ho konta públika sira iha
duodesimu no kofre sira Estadu nian mamuk iha fulan Jullu.
"Ami halo aprezentasaun ne'e
iha sikunstánsia inédita no exesionail, liu hosi difikuldade politiku, hosi
disolusaun Parlamentu no konvokasaun ba eleisaun antesipada ne'ebé mak obriga
ami hodi submete proposta ba orsamentu ida, 'sai hosi tempu', ne'ebé mak
ezekutadu ona fulan ualu resin tinan fiskal 2018 nian", hatete.
Xefe Governu ne'e hatete katak
konta sira ne'e abranje faze tolu "situasaun ho komplexidade
espesial" nasaun nian, periodu entre janeiru no juñu tinan 2018, bainhira
Governu anterior ezekuta gastu sira hamutuk dolares millaun 402.
Hafoin ne'e tuir kedas periodu
fulan Jullu no Agostu, ho kedas VIII Governu, ho "situasaun kritika iha
tezouraria" ho de'it dolares millaun 20 iha kofre, tanba ne'e obriga hodi
halo pedidu ba levantamentu estraordinariu ho montente dolares millaun 140 hodi
Fundu Petroliferu, ne'ebé promulga hosi Prezidente iha fulan Agostu.
Faze ba datoluk ne'e engloba
fulan hat ikus tinan ne'e nian, bainhira Governu prevé gastus total sira
hamutuk dolares millaun 715, parte boot liu hodi selu divida sira no ho kumpri
kompromisu tinan ikus nian.
Hatete katak, too ona tempu, hodi
"hahú kapitulu foun ida, ne'ebé pozitivu, normal no seguransa ba
ekonomia" ho orsamentu ne'ebé ajuda hodi "kria kondisaun politika no
finanseira ba dezenvolvimentu nasaun nian, ho media sira ne'ebé mak promove
kresimentu ekonomiku".
Orsamentu ne'e ho valor dolares
amerikanu millaun hamutuk 1.279,6 no engloba reseita sira hotu no despeza sira
Estadu nian no Seguransa Sosial Timor-Leste nian, durante periodu entre loron
01 Janeiru no 31 Dezembru 2018.
Valor ne'e soma hamutuk dolares
millaun 181,7 referente ba kontributu ba parseiru dezenvolvimentu sira, ho OJE
ne'ebé "kiik liu" hosi tinan 2017.
Ho orsamentu ne'e Governu ne'e
hatete katak hakarak "ultrapasa difikuldade sira hosi situasaun negativa
ne'e, ne'ebé maka obrika finansia despeza publika ho saldu restu ezekusaun
orsamental ba tinan fiskal 2017".
Governu iha "kondisaun
finanseira no orsamental sira ne'ebé presiza hodi realiza sira nian vizaun",
aposta iha dezenvolvimentu infraestrutura, rekursu umanus no diversifikasaun
ekonomia laos-petrolífera.
Primeiru-ministru hatete katak
Orsamentu ne'e "kontinua aposta iha debate ba despeza sira nian", ho
poupansa ida hamutuk dolares millaun 107 ba tinan 2017, ne'ebé buka
"ekilibriu entre nesesidade hodi regula gastu sira Estadu nian ba
situasaun ekonomika atual ne'ebé maka iha efeitu negativu iha nivel ba
evolusaun orsamental".
SAPO TL ho Lusa
Sem comentários:
Enviar um comentário