DÍLI, (TATOLI) - Embaixadór
timoroan ba mudansa klimátika ba Nasaun Unida, Justaquiu Fabiano Lasi (Jake) hateten
katak bainhira ita tesi ai no soe lixu arbiru sei fó ameasa ba biodiversidade,
liliu flora no fauna sira.
“Biodiversidade furak mak iha
tasi okos. Se ita tesi ai, soe fo’er ka lixu arbiru, soe mós iha mota no lori
ba tasi laran iha tempu udan, ikan sira iha tasi laran han plástiku mate, balun
afeta ita-nia korál,” informa embaixadór, Justaquiu Fabiano Lasi ba Ajénsia
TATOLI, iha Knua Juventude Fila Liman, Pateo-Díli, ohin.
“Se ita tesi ai arbiru, ita duni
ita-nia flora no fauna sira hanesan makikit, manu ho espésie oioin,” hatutan
embaixadór foinsa’e ba mudansa klimátika ne’e.
Jake hateten katak iha ita-nia
rain sei iha tesi ai arbiru no lixu balun sei namkari, iha fatin públiku balun.
Tanba ne’e, tuir nia, atu minimiza tesi ai arbiru no so’e lixu ita hahú halo
sensibilizaun, tuur halo dialógu hamutuk; governu, ONG (Organizasaun Naun
Governamentál) eh nahe biti-boot, hodi ko’alia kona-ba mudansa klimátika. Ita
seidauk iha.
Embaixadór Justaquiu Fabiano Lasi
mós fó mensajen katak hahú agora ita tenke promove bebeik halo limpeza iha
tasi. Nune’e mós tenke proteje biodiversidade liuhusi koloka seguransa nomós
halo sensiblizasaun kona-ba importánsia husi biodiversidade.
“Ita tenke abitua uza bote hodi
reduz plástiku. Se ita kontinua importa plástiku, ita la promove ita-nia
produtu lokál sira, liliu sira ne’ebé agora dadaun halo hela bote. Ne’e
araska,” nia fó hanoin.
Cipriana Auxilidora de Araújo,
estudante ida, husi Universidade Nasionál Timor Lorosa’e (UNTL) hateten katak
lixu sei sai problema ida ba ita tanba ita seidauk konsiente ba ita-nia
hahalok, hodi kontinua soe fo’er arbiru, fó impaktu ba saúde, depois la
konserva ambiente.
Estudante Cipriana Auxilidora de
Araújo ne’e mós fó sujere katak hanesan joven ita tenke luta nafatin hodi
konserva ita-nia ambiente no kontribui la so’e fo’er arbiru, liuhusi hatoman
aan ho ezemplu ki’ik husi uma laran.
“Ha’u-nia mensajen ba maluk
timoroan sira hotu katak ita juventude mak sai hanesan forsa, sai hanesan xave
ba konvservasaun. Tan ne’e, husu ita hotu atu luta maka’as nafatin, hodi la’o
tuir dalan ne’ebé mak di’ak ho esperansa katak harii nasaun sai saudável,” nia
fó mensajen.
Joven dezempregu ida, Arsenio
Filipe do Rego Belo rekoñese katak tesi ai arbiru bele fó impaktu ba ambiente,
hanesan erosaun, menus bee, maibé tanba nesesidade obriga komunidade, sira hodi
tesi ai no fa’an hodi sustenta moris.
“Tesi ai la di’ak, la tesi mós la
di’ak. Tanba, bainhira ita-nia ekonomia hahú fraku, liliu osan, hakarak ka
lakohi tenke tesi duni ai para fa’an buka osan,” hateten joven husi Suku
Tirilolo, Munisípiu Baucau, ne’e.
Kona-ba lixu, alumni, Ensinu
Sekundáriu Jerál Finantil ne’e, hateten katak ne’e fó imajen la di’ak ba
ita-nia sidade bainhira iha turista ruma ne’ebé mak hakarak vizita ita-nia
rain. Tanba ne’e, tuir nia, ita tenke hateten “zero ba lixu”.
“Kuidadu ambiente, hadomi ita-nia
sidade, liuhusi la so’e fo’er arbiru. Se ida ne’e ita hahú, neneik no bebeik,
ita bele kontribui ona ba hadi’a ita-nia sidade nia imajen hodi atrai turista
mai ita-nia rain. Bainhira turista mai, atividade turizmu la’o, ekonomikamente
osan mós sei tama hanesan rendimentu id aba ita-nia governu no estadu,” sujere
joven dezempregu ne’e.
Antes ne’e, organizasaun KADALAK
promove limpeza iha fatin públiku sira ho tema “Ema Matenek Tau Fo’er Tuir Nia
Fatin” ho sub-tema “Ema Ne’ebé Soe Foer Arbiru, Uma Laran = Lixu Fatin”, iha
Timor-Leste, liliu kapitál Díli.
Objetivu mak kuidadu tasi ibun no
jardin públiku sai moos, konsiensializa timoroan no ema li’ur labele soe fo’er
arbiru, promove tasi ibun no jardin ne’ebé moos ba timoroan no ema seluk,
inklui hadi’a karakter timoroan balun ne’ebé soe fo’er la tuir nia fatin.
Dosente husi ensinu superiór
privada katólika ne’e esplika tan mós katak impaktu husi fo’er namkari ne’e sei
fó ameasa ba labarik ka ema boot sira, liuhusi anintanba baktéria. La’ós ne’e
de’it, maibé sei kria inundasaun bainhira udan, tanba fo’er sira ne’e taka
valeta ku’ak halo bee la’o la tuir fatin. Impaktu seluk estraga imajen Díli,
tasi ibun no jardin ba ema husi nasaun seluk.
Tanba ne’e, KADALAK liuhusi nia
prezidente, Natalino de Jesus Dias, sujere ita hotu atu bele kuidadu ita-nia
ambiente liuhusi sira-nia slogan katak “Tau Fo’er Tuir Nia Fatin”. “Kuidadu
ambiente ne’e ema idaidak mak tenke konsiente (…). Se ema hotu, idaidak bele
koloka fo’er iha uma, eskola, fatin servisu, no fatin ne´ebé horik ba ka iha
ba, ita kontribui ba ambiente ne´ebé dignu ba ema hotu,” nia fó hanoin.
Entretantu, antes ne’e mós,
governu liuhusi Ministériu Komérsiu, Indústria no Ambiente (MKIA) liuhusi
Diresaun Nasionál Protesaun Biodiversidade, antes ne’e avizu fó atensaun ba
sidadaun hotu, tuir dekretu lei nú. 26/2012 lei baze ambientál artigu 7
(Sidadaun nia dever), kódigu penál 215 (Contra o ambiente), kódigu 217 (Contra
flora e fauna) husu ba publiku atu labele soe sigaru rohan ne’ebé lakan hela
husi kareta, motor ka transporte públiku.
Tuir mai, labele halo atividade
sunu rai, halo to’os iha área subaun boot ka área sira besik subaun, labele tau
ai-kose iha du’ut maran leten.
Labele soe lixu hanesan tisu,
plástiku, masa mamuk, kaixa mamuk falun hahan nomós labele soe botir rahun
hanesan serveza, kratingdaen nomós botir seluk tanba manas bele sunu
du’ut maran.
Inklui, husu kolaborasaun
sidadaun sira nian hodi kontribui hahalok pozitivu sira hodi asegura ambiente
liliu biodiversidade Timor-Leste nian.
“Ita halo mós advokasia ba iha
komunidade sira nomós ba juventude sira hodi ajuda halo no kontribui mós
”afirma Diretór Diresaun Nasionál Protesaun Rekuperasaun Biodiversidade
(DNPRB), Rui dos Reis Pires, ba jornalista sira, ohin, iha Knua Juventude
Fila Liman, Pateo-Díli, ohin, hafoin partisipa “Inspirational Talkshow” kona-ba
Promove Dame Liuhusi Konserva Biodiversidade iha Timor-Leste.
Diretór ne’e informa katak
koopera ona ho kompañia balun no fó apoia ona ba sira para halo redusaun ba
plástiku sira. “Karik botir ka masa sira bele halo transformasaun fali ba masa
kuru bee, vazu ba ai-funan no seluk tan,” informa Diretór Rekuperasaun
Biodiversidade, Rui dos Reis Pires.
Diretór DNPRB ne’e informa mós
katak tuir polítika governu nian agora mak reduz lixu to’o zero. “Signifika
katak ita tenke hapara ona importasaun plástiku. Depois ema hotu ba kompras
aihan ka buat ruma iha loja, lori bote. Agora lae, entaun ita tenke buka meius
halo nusa mak reduz plástiku sira,” realsa diretór Rui dos Reis Pires.
Jornalista: Rafy Belo | Editor:
Manuel Pinto
Imajen: Biodiversidade
Timor-Leste. Foto: Na Raiz - WordPress.com
Sem comentários:
Enviar um comentário