“Labele Kompara Estatutu Militár Ba Estatutu Polítiku”

DILI, (TATOLI) – Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur, la simu  argumentu hosi polítiku balun ne’ebé dehan ninia mandatu ne’e ilegál.

“Ema balun ne’ebé dehan ha’u nia mandatu ilegál ne’e, ema ne’e matan delek no ema ida ne’ebé laiha hanoin. Sira labele kompara ami nia estatutu (estatutu militár) ho estatutu polítiku. Ida ne’e oin seluk. Ami militár ne’e legál ka ilegál ne’e militár nafatin”, Lere ba jornalista sira iha Palásiu Prezidente Nicolau Lobato, Bairru Pité, semana kotuk, bainhira hatan kona-ba akuzasaun hosi polítiku balun ne’ebé dehan ninia mandatu lidera F-FDTL ne’e ilegál.

Nia afirma bainhira bolu nia ilegál ne’e nia sente sokadu, tanba uma ne’e (instituisaun F-FDTL) sira maka harii no hela duni iha sira nia uma laran rasik maibé tanbasá bolu sira ilegál.

“Ha’u la’ós kaan kadeira. Ha’u ne’e boot kedas hosi ailaran to’o agora. Tanba ne’e, kuandu bolu ami ilegál ne’e ha’u nia fuan kanek”.

Eis Komandante Gerileiru ne’e hateten ninia estatutu atu lidera hikas F-FDTL ka lae ne’e depende ba Prezidente Repúblika nia desizaun no prontu lidera instituisaun refere (F-FDTL) bainhira Prezidente Repúblika kontinua hanaruk ninia mandatu.

Jornalista: Xisto Freitas | Editora: Rita Almeida

Imajen: Xefe Estadu Maior Jenerál FALINTIL-Forsa Defeza Timor-Leste (F-FDTL), Lere Anan Timur. Imajen António Goncalves