VIQUEQUE, (TATOLI) - Ministériu
Obra Públika (MOP) asina ona kontratu ho konsultór no kompañia atu hahú
konstrusaun diresaun estrada Baucau-Viqueque iha tempu badak nia laran (másimu
fulan rua tan).
Projetu refere hetan ona vistu
prévia hosi Tribunál Kontas, maibé falta de’it konsultór no kontraktor maka iha
hela prosesu atu hetan vistu prévia hosi Tribunál Kontas.
Ministru Obra Públika, Salvador
Pires, hateten, governu kontinua konetividade fíziku entre rejiaun tomak iha
Timor-Leste, inklui mós Viqueque, nune’e, bele hasa’e kreximentu sósiu
ekonómiku ba povu nia moris.
“Ita kontinua estrada rejionál,
munisipál no rurál sira ne’ebé maka halo ligasaun entre área produtiva no
merkadu, nune’e, povu bele halo sira nia atividade ekonómiku”, Ministru
Salvador Pires, esklarese iha ambitu diálogu entre komunidade Viqueque ho
Prezidente Repúblika, Francisco Guterres Lú Olo, iha salaun Administrasaun
Munisípiu Viqueque, Biloi, Munisípiu Viqueque, Sesta (26/4/2019).
Ba estrada munisipál, Ministru
Salvador esklarese tan, governu hanoin katak sei konstrui hamutuk kilómetru 150
ba Munisípiu Viqueque no totál kilómetru 74 ne’ebé maka tau ona iha estudu
viabilidade hanesan Uatulari-Laisorulai-Ossu-Quelicai no Uacala-Laga,
Baguia-Uatucarbau ne’ebé nia tenderizasaun sei sai iha tinan ida ne’e.
Kona-ba estrada rurál, foin
lalais, MOP asina tiha ona akordu ho parseiru dezenvolvimentu, liu-liu governu
Austrália no tinan-tinan governu kompromete taun millaun US$20 atu halo estrada
iha territóriu tomak inklui Viqueque.
“Atu hateten ba ita-boot sira
katak iha estrada rurál purvolta kilómetru 32 ne’ebé maka iha tinan ida ne’e
governu atu halo. Ida ne’e fahe ba 12 itál para halo reabilitasaun no
manutensaun depois 20 itál tama iha planu maka hanesan Nahareca, Uaibobo no
Ossu Désima. Ida ne’e atu implementa iha tinan 2020” , hateten Salvador Pires
hodi lia tun tan, konstrusaun estrada Lacluta liga ba Cribas mós tama ba iha
dezeñu tinan 2020 no hanoin katak governu bele halo.
Salvador haktuir katak, estrada
rurál iha kilómetru 40 ne’ebé maka iha projetu 42 tama iha fundu infraestrutura
no mós liña ministeriál ne’ebé oras ne’e hala’o hela.
Jornalista: Xisto Freitas | Editór:
Francisco Simões
Imajen: Ministru Obras Públikas
Salvador Soares dos Reis Pires. Imajen/Egas Cristovão
Sem comentários:
Enviar um comentário