Makau sei ajuda Timor-Leste hodi hadi'a kualidade hosi serbisu saúde nian

Autoridade sira Makau ho Timor-Leste nian lansa ona iha loron-sesta ne'e projetu ida hodi halo iha área saúde nian, iha ámbitu hosi inisiativu xineza "Uma Faixa, Uma Rota" no hamutuk ho Organizasaun Mundial Saúde (OMS) nian.

"Hein katak parseria ne'e hadi'a kualidade hosi serbisu sira saúde nian iha Timor-Leste, promove kualifikasaun hosi instituisaun sira ho ema sira hosi saúde lokal no aprofunda koperasaun ho nasaun sira lian portugés nian iha área saúde nian", deklara hosi sekretáriu ba Asuntu Sosial sira ho Kultura Makau nian, Alexis Tam.

Makau hakarak investe iha projetu ne'e, ho naran 'Hospital Twinning Partnerships', osan hamutuk dolar millaun ida (euro rihun 900), avansa hosi diretor Serbisu sira Saúde Makau nian, Lei Chin Ion, bainhira hakotu serimónia ne'ebé maka akontese iha teritóriu iha prezensa hosi reprezentante sira timoroan sira nian no hosi OMS.

Alexis Tam salienta katak "liuhosi partisipasaun iha inisiativa 'Uma Faixa, Uma Rota", teritóriu bele "apoia dezenvolvimentu saúde nian iha Timor-Leste", maibé "hadi'a mós nia kompetividade rasik".

Lansa hosi OMS iha tinan 2009, projetu duplikasaun ne'e nia objetivu maka ajuda nasaun sira ne'ebé ladún dezenvolvidu hodi hadi'a kualidade ho seguransa ba kuidadu sira saúde, liuhosi fahe esperiénsia sira ho apoiu tékniku hosi parseiru sira duplikasaun nian.

Iha sentidu ne'e, autoridade sira Makau nian sei ajuda Timor-Leste, ne'ebé "seidauk iha projetu sustentável ida iha área saúde nian", kria "rejimi medisina jeral no aperfeisoa mekanizmu prevensaun hosi moras sira", hatutan hosi diretor hosi Serbisu sira Saúde.

Hodi reprezenta Timor-Leste, João Manuel Ximenes, hosi Ministériu Saúde timoroan nian, hatete katak hein atu jerasaun sira iha futuru bele hetan benefísiu hosi parseria ne'e no hatudu konfiante iha "partisipasaun ativu" hosi Makau ho reforma sira iha futuru hosi nasaun ne'e iha área ne'e.

Lansa iha tinan 2013, hosi Prezidente xinés, inisiativa "Uma Faixa, Uma Rota" materializa vokasaun internasionalista foun hosi Pekin. Líder hosi nasaun hamutuk 27 inklui Prezidente Repúblika portugés, Marcelo Rebelo de Sousa, partisipa iha loron-sesta ne'e iha loron daruak hosi fórum "Uma Faixa, Uma Rota", iha Pekin.

To'o loron ohin, Portugal hanesan nasaun ida hosi nasaun Uniaun Europeia nian ne'ebé apoia tuir dalan formal projetu ida ne'ebé hamosu opiniaun oioin ho poténsia osidental sira, ne'ebé haree orden mundial foun ida ne'ebé maka kaer hosi rival estratéjiku ida, ho sistema polítiku ida no valor ne'ebé maka oinseluk.

Prjetu boot hosi infraestrutura sira hakarak liga Sudeste Aziátiku, Ázia Sentral, Áfrika ho Europa, no haree hanesan versaun xineza hosi 'Planu Marshall', lansa hosi Estadus Unidus hafoin Funu Mundial Daruak, hodi permiti ba Washington hodi kria fundasaun hosi aliansa sira ne'ebé maka dura to'o ohin loron.

Lusa | SAPO TL