AINARO - Komisaun Nasional Timor
Leste ba UNESCO (KNTLU), halo expozisaun kultura, edukasaun no siensia ba
estudantes, nomos realiza seminariu, ho tema “prezerva kultura hodi kontribui
ba dezenvolvimentu sustentavel”.
Expozisaun nee halao iha edifisiu
Munisipal Ainaro, neebe hetan marka prezensa husi Sekretaria ezekutiva KNTLU,
Cedelizia dos Santos, Sekretariu Estadu Arte no Kultura (SEAK), Teofilo Caldas,
prezidente autoridade Munisipiu Ainaro, Alberto Araujo, direitor eskola,
funsionariu UNESCO no SEAK, inklui estudante sira.
Ba jornalita, Sekretaria
ezekutiva KNTLU, Cedelizia dos Santos, hatete, Komisaun Nasional Timor Leste ba
UNESCO (KNTLU)karik laos UNESCO ida internasional, hanesan orgaun otonomi ida,
neebe tutela iha Ministeriu Ensinu Superior Siensia no Kultura nian okos, maibe
sei halao servisu neebe hanesan lolos UNESCO internasional, iha area edukasaun
siensia, kultura nomos komunikasaun.
“Ami hanesan ponte entre governu
TL hamutuk ho UNESCO internasional, ami nian atividades lubuk ida, ami sei hatoo
liu husi video badak ida, entaun ita nian seminariu ba loron ohin ninia nee,
ohin dader ami komesa ona halo expozisaun ba kultura, edukasaun no siensia,
tanba ita koalia oinsa prezerva kultura, papel komisaun nian, peskiza neebe ami
halo ona , ita hatene katak, iha Marobo, iha uma lulik barak mak mudifika hotu
ona, ninia estrutura husi uza material modernu, tanba ho razaun dut laiha,
tanba nee, prezerva kultura laos servisu SEAK ninia deit, maibe
responsabilidade mai ita hotu,”dehan Cedelizia ba jornalista iha salaun
Munisipiu Ainaro Kinta (25/04/2019).
Sekretaria Ezekutiva KNTLU,
Cedelizia, akresenta, UNESCO halo ona peskiza ba uma lulik iha Marobo, nomos
iha Oecusse, neebe mak rezultadu nee hatudu katak, uma lulik barak ameasadu
mudansa ba sira nian estruturad.
Nunee mos, Sekretariu Estadu Arte
no Kultura (SEAK), Teofilo Caldas, hatete, prezerva salva guarda promove
patremonia cultural, tanba nia preokupa uituan, oinsa atu defende
orginalidade patremonia cultural, tanba tauk tinan atus ida lima
nolu mai oin, uma dut sira sei lakon.
“Prezerva salva guarda promove
patremonia cultural, hau preokupa uituan, oinsa atu defende orginalidade ita
nian patremonia cultural, ida nee mak hau preokupa, ita tauk tinan atus ida
lima nolu mai oin, uma dut sira nee lakon hotu, entaun orginalidade kultura TL
nee ita la hetan , ida nee mak hau hattoo hau nian preokupasaun ba Primeiru
Ministru (PM), maibe SEAK hakarak kontinua defende orginalidade kultura TL,
defikuldade no dezafiu lubuk ida, iha Bobonaro ita nian komunidade sira
aprejenta dehan, dut karau han mohu tiha, entaun ita sente unidade familia hari
uma lulik laiha, ida seluk uma lulik neebe uluk ita nian bei ala sira konstroi
iha foho leten, ohin sira muda hotu tun mai iha tetuk, tanba la asesu bee mos,
Estrada no eletrisidade,”dehan nia.
SEAK Teofilo mos sublina, SEAK
hakarak atu kontinua motiva komunidade sira, oinsa atu prezerva oroginalidade
cultural, labele halo lakon, Timor hotu tenke sente nain ba kultura, labele ba
eskola deit iha Indonesia, fila mai
TL , nunka koinese kultura TL.
Entretantu Prezidente Autoridade
Munisipiu Ainaro, Alberto Araujo, hatete, koalia konaba prezerva kultura, hodi
kontribui ba dezenvolvimentu sustentabel, tanba kultura hanesan parte ida neebe
importante tebes.
“Hau apersia ho programa tomak
neebe mak ohin ita realize, tanba kooperasaun entre governu ho parseiru UNESCO,
ita atu koalia konaba oinsa mak it abele kria mekanizmu oi-oin, ba
dezenvolvimentu parte kultura ninia,”dehan nia.
Jacinta Sequeira | Suara Timor
Lorosae
Sem comentários:
Enviar um comentário